पालिकेकडून मूर्तीकारांना ९१० टन मोफत शाडू मातीचे वाटप

मूर्तिकारांना मोफत शाडू मातीचे वाटप
पर्यावरणपूरक गणेशोत्सवासाठी पालिकेचा उपक्रम
मुंबई, ता. २५ : मुंबईत शाडू मातीच्या मूर्ती घडविण्याकरिता प्रोत्साहन मिळावे, पर्यावरणपूरक मूर्तींची प्रतिष्ठापना व्हावी, यासाठी महापालिकेकडून प्रत्येक परिमंडळात पर्यावरणपूरक मूर्ती घडविणाऱ्या मूर्तिकारांना दरवर्षीप्रमाणे यंदाही मोफत शाडू माती पुरविण्यात आली आहे. आतापर्यंत एकूण ९१० टन शाडू माती मोफत देण्यात आल्याची माहिती पालिकेने दिली.
पर्यावरणपूरक मूर्ती घडविणाऱ्या एकूण ९९३ मूर्तिकारांना मूर्ती घडविण्यासाठी मंडप परवानगी देण्यात आली असून ज्या मूर्तिकारांना आणखी शाडू माती हवी असेल, त्यांनी महानगरपालिकेच्या संकेतस्थळावर (www.mcgm.gov.in) अर्ज करून मागणी नोंदवावी, असे आवाहन पालिका प्रशासनाच्या वतीने उपआयुक्त प्रशांत सपकाळे यांनी केले आहे. गेल्या वर्षी ५०० टन माती मोफत देण्यात आली होती. त्या तुलनेत यावर्षी एप्रिल २०२५ पासूनच पर्यावरणपूरक मूर्ती घडविण्यासाठी मूर्तिकारांनी मोठ्या प्रमाणात शाडू मातीची मागणी केली असता महापालिकेने त्यांची मागणी पूर्ण केली असल्याचे पालिकेने म्हटले आहे.
आतापर्यंत ९१० टन इतकी शाडू माती मोफत वाटप करण्यात आली आहे. पर्यावरणपूरक मूर्ती घडविणाऱ्या मूर्तिकारांसाठी महानगरपालिकेच्या उपलब्ध असलेल्या जागेनुसार ‘प्रथम अर्जदारास प्राधान्य’ या तत्त्वावर आवश्यक ती जागादेखील विनामूल्य उपलब्ध करून देण्यात आली असल्याची माहिती पालिकेने दिली आहे.