व्याजाच्या प्रलोभनातून कोट्यवधींचा गंडा

मुरूड, ता. २६ (बातमीदार)ः लाख रुपये गुंतवल्यानंतर महिन्याला दहा हजारांचे व्याज देण्याच्या प्रलोभनातून मुरूडमध्ये अनेकांना कोट्यवधींचा गंडा घातला आहे. या प्रकरणात न्यायालयाने मुख्य आरोपीला सोमवारी (ता. २८)पर्यंत पोलिस कोठडी दिली.
मुरूड पोलिसांनी काही दिवसांपूर्वी प्रसन्न पुलेकरला अटक केली होती. त्याच्याविरोधात तक्रारदार महेश भगत यांच्यासह १३६ जणांनी फसवणूक झाल्याची तक्रार नोंदवली होती. तसेच आठ कोटींहून अधिक रकमेची फसवणूक झाल्याची तक्रार नोंदवण्यात आली आहे. याप्रकरणी मुरूड पोलिसांकडून चौकशी सुरू आहे. तसेच लोकांकडून गुंतवणूक केलेली रक्कम कुठे गुंतवली, तसेच आणखी कोणाच्या सहभागाबाबत माहिती घेतली जात आहे.
-----------------------------------
फसणुकीचा आकडा वाढणार
मुरूड पोलिस ठाण्याचे पोलिस निरीक्षक परशुराम कांबळे यांनी दिलेल्या माहितीनुसार प्रत्येक बाब तपासली जात आहे. बँक नसताना आर्थिक व्यवहार करणे, हा कायदेशीर गुन्हा असून तूर्तास आठ कोटींची फसवणूक झाली असल्याची माहिती आहे; पण हा आकडा आणखी वाढण्याची शक्यता आहे.