तळोजा पादचारी भुयारी मार्गात दुचाकींचे अतिक्रमण

तळोजा पादचारी भुयारी मार्गात दुचाकींचे अतिक्रमण
रेल्वे ट्रॅक ओलांडण्याची वेळ; दिवे बंद, विनयभंगाच्या घटनांत वाढ
खारघर, ता. २६ (बातमीदार) : तळोजा रेल्वे फाटकाजवळ पादचाऱ्यांसाठी उभारलेल्या भुयारी मार्गात गेल्या काही दिवसांपासून दिवे बंद असल्याने विनयभंगाचा प्रकार घडला होता. आता या भुयारी मार्गात दुचाकीचालकांचे अतिक्रमण वाढले असून, त्यामुळे पादचाऱ्यांना जीव धोक्यात घालून रेल्वे ट्रॅक ओलांडण्याची वेळ येत आहे. त्यामुळे महिलावर्गात भीती निर्माण झाली आहे. रहिवाशांनी याबाबत रेल्वे प्रशासन आणि वाहतूक पोलिसांकडे तातडीने कारवाई करण्याची मागणी केली आहे.
दिवा-पनवेल मार्गावरील तळोजा रेल्वे फाटकाजवळ सिडको व रेल्वे प्रशासनाने वाहतूक कोंडी सोडवण्यासाठी दोन भुयारी मार्ग उभारले आहेत. वाहनांसाठी १५ मीटर आणि पादचाऱ्यांसाठी ३ मीटर असे मार्ग तयार करण्यात आले आहेत. वाहनांसाठीच्या मार्गात प्रकाश व्यवस्था सुरळीत असली तरी पादचाऱ्यांच्या भुयारी मार्गात महिनाभरापासून दिवे बंद होते. त्यामुळे महिलांसह लहान मुले आणि वृद्धांना अंधाऱ्या व एकाकी मार्गातून चालणे धोकादायक झाले होते. सध्या या मार्गात दिवाबत्तीची सोय करण्यात आली आहे. पादचाऱ्यांसाठी असलेला तीन मीटरचा भुयारी मार्ग दुचाकीचालक शॉर्टकट म्हणून वापरू लागले आहेत. त्यामुळे पादचाऱ्यांना या भुयारी मार्गातून चालणे अवघड झाले आहे. दुचाकींच्या वेगामुळे अपघाताचा धोका वाढला आहे, असे स्थानिकांनी सांगितले.
...................
रेल्वे व वाहतूक विभागाकडून आश्वासने
रेल्वेच्या विद्युत विभागाने सांगितले की सुरक्षा रक्षक नेमण्याचा अधिकार मुंबई कार्यालयाकडे असून, नागरिकांनी तिथे पत्रव्यवहार करावा. तळोजा वाहतूक विभागाचे वरिष्ठ पोलिस निरीक्षक दिलीप चव्हाण यांनी सांगितले की, पादचारी मार्गात दुचाकी जाऊ नये यासाठी लोखंडी खांब लावले जातील, तसेच वाहतूक पोलिसांकडून योग्य ती कारवाई केली जाईल.
.............
तळोजा येथे पादचाऱ्यांसाठी उभारलेले भुयारी मार्ग धोकादायक आहेत. दिवे सुरू झाले की काही दिवसांतच बल्ब आणि वायरची चोरी होते. महिलांना एकटे जाणे शक्य नसते. वर दुचाकी चालवणाऱ्यांचा त्रास असल्याने पादचाऱ्यांना रेल्वे ट्रॅक ओलांडण्याशिवाय पर्याय उरत नाही.
- आशा बोरसे, अध्यक्ष, गौऱ्या गणपती महिला मंडळ, तळोजा फेज