केडीएमसीच्या शाळा क्रं१९ मधील तीन शिक्षकांना कारणे दाखवा नोटीस

मुख्याध्यापकांपाठोपाठ शिक्षक रडारवर
केडीएमसीच्या शाळा क्रमांक १९ मधील तीन शिक्षकांना कारणे दाखवा नोटीस
कल्याण, ता. २५ (वार्ताहर) : केडीएमसीच्या शाळा क्रमांक १९मधील तीन शिक्षकांना कारणे दाखवा नोटीस बजावली आहे. याआधी ३८ मुख्याध्यापकांनाही कारणे दाखवा नोटीस दिली होती. यामुळे आता मुख्याध्यापकांपाठोपाठ शिक्षक देखील रडारवर आले असल्याचे दिसत आहे.
कल्याण-डोंबिवली शिक्षण विभागातील मनपाच्या ६१ शाळांपैकी सुमारे ३८ मुख्याध्यापकांना प्रशासनाने कारणे दाखवा नोटीसा काही दिवसांपूर्वी बजावल्या होत्या. नुकतेच नेतवली येथील मनपा शाळा क्रमांक १९ प्रबोधनकार ठाकरे शाळेतील तीन शिक्षकांना नोटीस बजावली आहे. मासिक अभ्यासक्रम चाचणी अंतर्गत काही विद्यार्थ्यांमध्ये प्रगती न आढळल्याचा ठपका ठेवत शिक्षण विभाग उपायुक्त यांनी नोटीस बजावली आहे. यामुळे कामचुकार कर्तव्यात कुसूर करणाऱ्या शिक्षकांची आता खैर नसल्याचे दिसत आहे.
सूत्रांच्या माहितीनुसार, आयुक्तांच्या मार्गदर्शनाखाली शिक्षण विभाग उपायुक्त यांनी केडीएमसी अधिकाऱ्यांना शाळांचे पालकत्व देत शिक्षण दर्जासह सोयीसुविधा आढावा घेतला. नुकताच प्रबोधनकार ठाकरे शाळेचा पाहणी दौरा आयुक्तांनी केला. पहिली ते आठवीपर्यंत सुमारे ४५० विद्यार्थी पटसंख्या असलेल्या या शाळेतील शिक्षकांना धारेवर धरले होते. एकंदरीत पाहता मनपा शाळेतील विद्यार्थी शैक्षणिक दर्जा गुणवत्ता, सोयी सुविधांबाबत प्रशासनाने लक्ष केंद्रीत केले आहे.