अनधिकृत बांधकामांविरोधात पालिका आक्रमक

अनधिकृत बांधकामांविरोधात पालिका आक्रमक
ठाण्यात १५१ अनधिकृत बांधकामांवर कारवाई
सकाळ वृत्तसेवा
ठाणे, ता. २६ : ठाणे पालिका क्षेत्रातील अनधिकृत इमारतींवरून पालिका प्रशासनावर टीकेची झोड उठविण्यात येत आहे. १९ जूनपासून अनधिकृत इमारतींच्या विरोधात पालिका आता आक्रमक झाल्याचे दिसून येत आहे. अशातच उच्च न्यायालयाने दिलेले निर्देश आणि प्रभाग समितीच्या बीट निरीक्षकांनी केलेल्या सर्वेक्षणात समोर आलेल्या १५१ अनधिकृत बांधकामांवर पालिकेच्या अतिक्रमण विरोधी पथकाने कारवाई केली आहे. यामध्ये ११७ बांधकामे पूर्णपणे निष्कासित करण्यात आली आहेत, तर ३४ ठिकाणचे वाढीव बांधकाम हटवण्यात आले असल्याची माहिती पालिका प्रशासनाने दिली आहे.
ठाणे महापालिका क्षेत्रात १९ जूनपासून नियमितपणे अतिक्रमण विरोधी पथकाची कारवाई सुरू आहे. त्यासाठी नऊ प्रभाग समिती क्षेत्रांमध्ये उपायुक्त दर्जाच्या अधिकाऱ्यांच्या नेतृत्वात विशेष पथकांची नियुक्ती केली आहे.
------------------------------
कारवाई नियमितपणे
महापालिका क्षेत्रात अनधिकृत चाळी, अनधिकृत बैठी बांधकामे, वाढीव शेड, वाढीव बांधकाम, प्लिंथचे बांधकाम, अनधिकृत टर्फ अशा प्रकारच्या बांधकामांवर कारवाई करण्यात आली. ही कारवाई नियमितपणे सुरू राहणार असल्याची माहितीही उपायुक्त पाटोळे यांनी दिली. या मोहिमेची अंमलबजावणी व प्रत्यक्ष कारवाई यांचा दैनंदिन स्वरूपातील आढावा अतिरिक्त आयुक्त प्रशांत रोडे घेत आहेत.
-------------------------------------
न्यायालयाच्या आदेशानुसार
अतिक्रमण विरोधी कारवाईमध्ये उपायुक्त (परिमंडळ), सर्व सहाय्यक आयुक्त, कार्यकारी अभियंता, अतिक्रमण आणि बांधकाम विभागाचे अधिकारी व कर्मचारी सहभागी झाले. या कारवाईसाठी पोकलेन, जेसीबी, गॅस कटर, ट्रॅक्टर ब्रेकर, मनुष्यबळ यांचा वापर करण्यात येत आहे. पोलिस आणि महाराष्ट्र सुरक्षा बलाचे जवान यांच्या बंदोबस्तात ही कारवाई करण्यात येत आहे. कोणत्याही प्रकारच्या अनधिकृत बांधकामाला वीजपुरवठा करण्यात येऊ नये, असे उच्च न्यायालयाचे स्पष्ट आदेश आहेत. त्या अनुषंगाने ठाणे महापालिका क्षेत्रात महावितरण आणि टोरंट या दोन्ही वीज कंपन्यांनी या आदेशाचे तंतोतंत पालन करावे, असे निर्देशही देण्यात आले आहेत.
-------------------------------------
पाणी खंडित करा
अनधिकृत बांधकामांना पाणीपुरवठा दिला असल्यास त्याची कागदपत्रे तपासण्यात यावी व बांधकाम अवैध असल्यास नळजोडणी तत्काळ खंडित करण्यात यावे. त्याचप्रमाणे महापालिकेच्या जलवाहिनीवरून अवैधरीत्या नळजोडणी घेतली असल्यास ती तत्काळ खंडित करावी. तसेच यापुढे पाणी संयोजन देत असताना पालिकेच्या बांधकाम परवानगीशिवाय कोणत्याही अनधिकृत बांधकामास नळजोडणी दिली जाणार नाही, याबाबत दक्षता घेण्यात यावी. यापूर्वी ज्या नळजोडण्या दिल्या आहेत त्या तत्काळ खंडित करण्याचे आदेशही आयुक्तांनी दिले आहेत.

................................

प्रभाग समिती क्षेत्रात बीट निरीक्षकांनी नोंदलेली आणि सध्या सुरू असलेली अनधिकृत बांधकामे पाडण्यास या मोहिमेत प्राधान्य आहे. आतापर्यंत ११७ अनधिकृत बांधकामे पूर्णपणे पाडली आहेत, तर ३४ या बांधकामांमधील अनधिकृत वाढीव बांधकामे हटवण्यात आल्याचे अतिक्रमण नियंत्रण विभागाचे उपायुक्त शंकर पाटोळे यांनी सांगितले.
.........................
* कारवाईच्या आकडेवारीचा तक्ता
(१९ जून ते २४ जुलैपर्यंतची आकडेवारी)
नौपाडा-कोपरी - १०
दिवा - ४०
मुंब्रा - २०
कळवा - १७
उथळसर - १०
माजिवडा-मानपाडा - २६
वर्तकनगर - ११
लोकमान्यनगर - १३
वागळे इस्टेट - ०४
एकूण - १५१