दिवा तलाव सुशोभीकरणासाठी तत्काळ निधी मंजूर करा

‘दिवा तलाव सुशोभीकरणासाठी तत्काळ निधी मंजूर करा’
भाजप शिष्टमंडळाने आमदार राजेश मोरे यांची भेट घेतली
सकाळ वृत्तसेवा
डोंबिवली, ता. २५ ः दिवा स्टेशन परिसरातील तलावाची गेल्या १७ ते १८ वर्षांपासून अवस्था बिकट आहे. तलाव परिसराचे पात्र बुजवून अनधिकृत गाळे बांधण्यात आले आहेत. स्टेशन परिसरात बसणारे मच्छी विक्रेते, भाजी विक्रेते, त्यात घाण पाणी व इतर कचरा टाकत आहे. गेल्या अनेक वर्षांपासून तलावाच्या सुशोभिकरण रखडले आहे. या कामासाठी तात्काळ निधी मंजूर व्हावा. या मागणीसाठी दिवा भाजप शिष्टमंडळाने कल्याण ग्रामीणचे आमदार राजेश मोरे यांची भेट घेतली आहे.
दिवा स्टेशन जवळील तलाव आणि आजूबाजूच्या परिसरात घाणीचे साम्राज्य पसरले आहे. स्टेशनवरून ये-जा करणाऱ्या सर्व नागरिकांना या दुर्गंधीचा सामना करावा लागत आहे. या सर्व समस्या घेऊन दिवा भाजप शिष्टमंडळाने शुक्रवारी (ता. २५) मोरे यांची भेट घेतली. यावेळी दिवा मंडळ अध्यक्ष सचिन भोईर, अशोक पाटील, गणेश भगत, रोशन भगत, दिलीप भोईर यांसह इतर सर्व सदस्य उपस्थित होते.
दिवा तलावाचे सुशोभीकरण करण्यात यावे यासाठी पुरेसा निधी उपलब्ध करून द्यावा, अशी मागणी करत मोरेंना निवेदन दिले. तसेच, यावेळी राज्यात लवकरच सर्वांचे आराध्य दैवत श्री गणेशाचे आगमन होणार आहे. गणेशोत्सवकाळात श्री गणेश मूर्तींच्या विसर्जनासाठी कृत्रिम तलावाची मागणी देखील दिवा भाजपच्या वतीने करण्यात आली. मोरे यांनी सकारात्मक चर्चा करून लवकरात लवकर निधीची उपलब्धता करण्यात येईल, असे आश्वासन शिष्टमंडळाला दिले.