स्टेशन परिसर फेरीवाला मुक्तीसाठी शिवसेनेचे उपोषण सुरुच

स्थानक परिसर फेरीवालामुक्तीसाठी शिवसेनेचे उपोषण सुरूच
शिवसेना ठाकरे गटाच्या शहरप्रमुखांची प्रकृती खालावली
सकाळ वृत्तसेवा
डोंबिवली, ता. २६ ः डोंबिवली पूर्व रेल्वेस्थानक परिसरात फेरीवाल्यांचे अतिक्रमण झाले असून हा परिसर फेरीवालामुक्त करण्यासाठी शिवसेना ठाकरे गटाच्या वतीने बेमुदत उपोषण सुरू केले आहे. गेल्या पाच दिवसांपासून शहरप्रमुख अभिजित सावंत यांच्या नेतृत्वाखाली हे उपोषण सुरू असून शुक्रवारी (ता. २५) सकाळी त्यांची प्रकृती खालावली.
सर्वोच्च न्यायालयाच्या आदेशानुसार, रेल्वेस्थानक परिसरातील किमान १५० मीटर क्षेत्र फेरीवालामुक्त ठेवणे बंधनकारक आहे; मात्र महापालिका प्रशासनाकडून याकडे जाणीवपूर्वक दुर्लक्ष केले जात असल्याचा आरोप शिवसेना ठाकरे गटाने केला आहे. या अतिक्रमणामुळे स्थानिक नागरिकांना दररोज वाहतूक कोंडी, धक्काबुक्की तसेच पादचाऱ्यांना गैरसोयींना सामोरे जावे लागत आहे. सावंत यांनी फेरीवाल्यांचे पुनर्वसन भाजी मंडईसारख्या निश्चित ठिकाणी करावे, स्वतंत्र फेरीवाला हटाव पथक नेमावे, तसेच रेल्वेस्थानक परिसरात स्पष्ट फलक लावून फेरीवालामुक्त क्षेत्र घोषित करावे, अशा विविध मागण्या केल्या आहेत.

प्रकृती खालावली
पाच दिवसांपासून सुरू असलेल्या आमरण उपोषणामुळे शहरप्रमुख सावंत यांची तब्येत बिघडली आहे. त्यांना अशक्तपणा, चक्कर येणे, डोकेदुखी यांसारखे त्रास जाणवत आहेत. डॉक्टरांकडून त्यांची वैद्यकीय तपासणी सुरू आहे. तरीदेखील त्यांनी आंदोलन थांबवण्यास नकार दिला आहे. आंदोलन सुरू होऊन पाच दिवस उलटले तरी पालिकेचा एकही अधिकारी फिरकलेला नाही, यामुळे आश्चर्य व्यक्त केले जात आहे.

महापालिकेचे दुर्लक्ष धक्कादायक
महापालिका अधिकाऱ्यांचे फेरीवाल्यांशी आर्थिक लागेबंध असल्यामुळेच कोणतीही कठोर कारवाई केली जात नाही. केवळ दिखाव्याची कारवाई केली जाते. अनेकवेळा फेरीवाल्यांकडून नागरिक, अधिकारी, रिक्षाचालक, राजकारणी व समाजसेवकावर हल्ल्यांचे प्रकार घडले आहेत. तरीही महापालिकेचे अधिकारी दुर्लक्ष करीत आहेत, हे अधिकच धक्कादायक आहे, असे सावंत यांनी सांगितले.