उल्हासनगरात पहिल्यांदाच चालकांसह संपर्क यादी प्रसिद्ध

उल्हासनगर, ता. २७ (वार्ताहर) : शहरात वैद्यकीय आणीबाणीच्या प्रसंगी वेळेवर रुग्णवाहिका न मिळाल्याने अनेकांना जीव गमवावा लागल्याच्या घटनांनी नागरिकांमध्ये अस्वस्थता निर्माण केली होती. या पार्श्वभूमीवर सामाजिक संस्था ‘सिटीझन हेल्थकेअर फाउंडेशन’च्या पाठपुराव्यामुळे, उल्हासनगर महापालिकेने एक सकारात्मक पाऊल उचलले आहे. महानगरपालिका आरोग्य विभागाने शहरातील सर्व नागरी आरोग्य केंद्रांमधून कार्यरत असलेल्या रुग्णवाहिकांची संपर्क यादी प्रथमच प्रसिद्ध केली आहे. या यादीमध्ये वाहन क्रमांक, चालकाचे नाव आणि थेट मोबाइल नंबर यांचा समावेश आहे. ही माहिती सोशल मीडियावर नागरिकांसाठी उपलब्ध करून देण्यात आली आहे.
यादीमुळे आता नागरिकांना तातडीच्या वेळी थेट रुग्णवाहिका चालकांशी संपर्क करता येणार आहे. ही यादी केवळ माहितीपुरती न राहता, तिचा प्रभावी वापर होणे गरजेचे असल्याचे मत नागरिक व्यक्त करत आहेत. फाउंडेशनने पुढील टप्प्यात नव्याने शहरात दाखल होणाऱ्या रुग्णवाहिकांची माहिती ‘वॉर रूम’मध्ये अद्ययावत ठेवण्याची मागणी प्रशासनाकडे केली आहे. “ही लढाई संपलेली नाही, ही केवळ सुरुवात आहे,” असे फाउंडेशनने स्पष्ट केले आहे. सकारात्मक सुरुवात असली तरी यंत्रणा वेळेवर आणि जबाबदारीने कार्यरत राहावी, हीच नागरिकांची अपेक्षा आहे.