लाखोंचा विदेशी मद्यसाठा जप्त

उल्हासनगर, ता. २६ (वार्ताहर) : अवैध दारूविक्रीच्या अड्ड्यांवर राज्य उत्पादन शुल्क विभागाने उल्हासनगरात कारवाई करत हरियाणा व दिल्ली येथून विक्रीस असलेला विदेशी मद्यसाठा जप्त केला आहे. विग सिनेमाजवळ प्रेस रोड परिसरात टाकलेल्या छाप्यात ७८ विदेशी दारूच्या बाटल्या आणि दोन लाख ३७ हजार १४० रुपयांचा मुद्देमाल हस्तगत केला आहे. तर विजय रामनानी याला ताब्यात घेतले आहे.
मध्यवर्ती पोलिस ठाण्याच्या हद्दीत नुकतीच ही कारवाई करण्यात आली. एक व्यक्ती परराज्यातून विदेशी दारू आणून अवैध विक्रीसाठी प्रयत्नात असल्याची माहिती मिळताच, विभागाने सापळा रचून हा साठा जप्त केला. हा साठा करचुकवेगिरी करून गुप्त मार्गाने शहरात आणला होता. ही कारवाई राज्य उत्पादन शुल्क विभागाचे आयुक्त राजेश देशमुख, संचालक अंमलबजावणी व दक्षता विभागाचे प्रसाद सुर्वे, कोकण विभागीय उप-आयुक्त प्रदीप पवार, अधीक्षक प्रविण तांबे आणि उप-अधीक्षक ए. डी. देशमुख यांच्या मार्गदर्शनाखाली यशस्वीरीत्या पार पडली. कारवाई पार पाडणाऱ्या पथकात निरीक्षक बी. के. जाधव, दुय्यम निरीक्षक अविनाश पाटील व उमेश गायकवाड, सहाय्यक दुय्यम निरीक्षक योगेश राणे, जवान शरद भोर, प्रशांत निकुंभ, मयूर तायडे व मंदार निजापकर यांचा सहभाग होता. याप्रकरणी अधिक तपास दुय्यम निरीक्षक अविनाश पाटील करीत आहेत. कारवाईनंतर उल्हासनगरातील अवैध विदेशी मद्यविक्रीच्या साखळीवर लगाम बसण्याची अपेक्षा व्यक्त केली जात आहे.