पालिकेच्या कर संकलन प्रक्रियेत पारदर्शकता

बदलापूर, ता. २६ (बातमीदार) : कुळगाव-बदलापूर नगरपालिकेच्या कर संकलन प्रक्रियेत आता पारदर्शकता व गतिशीलता येणार असून, इंडियन बँक (बदलापूर शाखा) यांनी आपली कॉर्पोरेट सोशल रिस्पॉन्सिबिलिटी (सीएसआर) निधीअंतर्गत दोन विक्री बिंदू (पीओएस) मशीन नगरपालिकेला भेट दिली आहेत. याद्वारे नागरिकांना कर भरणे अधिक सुलभ होणार आहे. घरपट्टीसह अन्य स्थानिक कर नगरपरिषद कार्यालयातच थेट डेबिट, क्रेडिट कार्ड किंवा यूपीआयच्या माध्यमातून भरता येणार आहेत. त्यामुळे रोख व्यवहारातील गैरसोयी टळतील आणि कर संकलन प्रक्रियेत पारदर्शकता व वेग येणार आहे.

पीओएस मशीनचा उपयोग सामान्यतः किरकोळ विक्री क्षेत्रात होतो. ग्राहकांना वस्तू किंवा सेवांसाठी पैसे भरता येतात. यामुळे व्यवहारात पारदर्शकता येते. बदलापूर पालिकेत करसंकलन विभागात या मशीनचा वापर केला जाणार असल्याने प्रक्रिया पारदर्शक व गतिमान होणार आहे. इंडियन बँकेच्या या विशेष उपक्रमामुळे डिजिटलायझेशन व ‘नगदी विरहित व्यवहार’ या केंद्र व राज्य सरकारच्या अभियानाला बळकटी मिळणार आहे. विक्री बिंदू मशीन मुख्याधिकारी मारुती गायकवाड यांच्या हस्ते पालिकेच्या कर संकलन विभागात सुरू करण्यात आले आहे. यावेळी लेखापाल, लेखापरीक्षक, कर अधिकारी व इंडियन बँकेचे शाखा अधिकारी सिंग व ठोंबरे उपस्थित होते. मुख्याधिकारी व प्रशासन विभागाने नागरिकांना या डिजिटल सुविधेचा लाभ घेण्याचे आवाहन केले आहे. तसेच या मशीन पालिकेला भेट देणाऱ्या बँकेचेही मुख्याधिकाऱ्यांनी आभार मानले.