रासायनिक उत्पादनांची राखरांगोळी

तुर्भे, ता. २६ (बातमीदार) ः एमआयडीसीतील रासायनिक उत्पादने तयार करणाऱ्या कंपनीला शनिवारी (ता. २६) पहाटेच्या सुमारास आग लागली होती. या आगीवर साडेतीन तासांच्या अथक प्रयत्नानंतर नियंत्रण मिळवण्यात अग्निशमन दलाला यश आले.
तुर्भे एमआयडीसीतील इंदिरानगर भागातील रेश्मा ऑर्गेनिक केमिकल्स कंपनी आहे. भूखंड क्रमांक डी ६१ येथे असणाऱ्या या कंपनीत शनिवारी पहाटे भीषण आग लागली. रासायनिक उत्पादनांमुळे आगीने काही क्षणात रौद्र रूप धारण केले होते. याबाबतची माहिती मिळाल्यानंतर नेरूळ एमआयडीसी अग्निशमन दल घटनास्थळी दाखल झाले; पण कंपनीतील ज्वालाग्राही पदार्थांमुळे आग आटोक्यात येत नसल्याने सीबीडी येथील पालिकेचे अग्निशमन दलदेखील मदतीसाठी रवाना झाले.
------------------------------
कारण अस्पष्ट
या घटनेत कोणी जखमी झालेले नाही. तसेच आग नक्की कशामुळे लागली, किती नुकसान झाले याबाबतची माहिती अद्याप समोर आलेली नाही. सकाळी साडेसातच्या सुमारास आगीवर नियंत्रण मिळवण्यात यश आले.