शिरवणे गावातील लॉजसह बारवर कारवाईची मागणी

शिरवणे गावातील लॉजसह बारवर कारवाईची मागणी
जुईनगर, ता. २६ (बातमीदार) : नेरूळजवळील शिरवणे गावातील बार आणि लॉजमुळे गावातील वातावरण बिघडले असून ग्रामस्थ त्रस्त झाले आहेत. त्यामुळे संतप्त ग्रामस्थांनी महापालिका आयुक्त डॉ. कैलास शिंदे आणि पोलिस प्रशासनाकडे कारवाईची मागणी केली आहे.
गावात सध्या १५ पेक्षा अधिक बार कार्यरत असून, त्यातील अनेक लेडीज बार असल्यामुळे रात्रीच्या वेळी अनोळखी महिलांची व ग्राहकांची वाढती वर्दळ, तसेच अवैध वेश्याव्यवसाय सुरू असल्याचे आरोप नागरिकांकडून करण्यात आले आहेत. स्थानिक नागरिकांच्या मते, अनोळखी महिलांची ये-जा आणि बारमधील गोंधळामुळे गावातील महिलांना रात्री फिरणे कठीण झाले आहे. शिवाय हे बार आणि लॉज रहिवासी क्षेत्रात असूनही १०० टक्‍के वाणिज्य वापर सुरू आहे, यामुळे कायद्याचे उल्लंघन होत असल्याचेही नागरिकांचे म्हणणे आहे. या बार आणि लॉजच्या बाहेर बिनधास्तपणे वाहने पार्क केली जात असल्यामुळे गावात वाहतूक कोंडीचा मोठा त्रास निर्माण झाला आहे. संतप्त ग्रामस्थांनी सर्व बार आणि लॉज यांचे भोगवटा प्रमाणपत्र व इतर परवानग्या तपासून एमआरटीपी कायद्याअंतर्गत तातडीने कारवाई करण्याची मागणी केली आहे. ग्रामस्थांच्या म्हणण्यानुसार, सहाय्यक पोलिस आयुक्तांनी नुकत्याच झालेल्या बैठकीत नवीन बारना परवानगी नाकारली जाईल, असे आश्वासन दिले होते. तथापि, त्यानंतर अवघ्या दोन दिवसांत एका नव्या बारचे उद्घाटन झाल्याने प्रशासनाच्या भूमिकेबाबत शंका उपस्थित करण्यात येत आहे.