पनवेलकरांचा अभय योजनेला उत्स्फूर्त प्रतिसाद

पनवेलकरांचा अभय योजनेला उत्स्फूर्त प्रतिसाद
नऊ दिवसांत ३० कोटींचे करसंकलन
पनवेल, ता. २६ (बातमीदार) ः पनवेल महापालिकेने १८ जुलैपासून सुरू केलेल्या ‘अभय योजने’ला मालमत्ताधारकांचा भरघोस प्रतिसाद मिळत आहे. फक्त नऊ दिवसांत ३० कोटींपेक्षा अधिक मालमत्ता कर महापालिकेच्या तिजोरीत जमा झाला आहे.
महापालिकेच्या कर विभागाने शास्ती माफीसह राबवलेली सवलतीची ही योजना नागरिकांना फायदेशीर ठरत असून, रोज सरासरी चार कोटींचे संकलन केले जात आहे. आयुक्त तथा प्रशासक मंगेश चितळे यांच्या मार्गदर्शनाखाली उपायुक्त स्वरूप खारगे यांच्या नियंत्रणात करवसुलीसाठी विशेष नियोजन करण्यात आले आहे. नागरिकांच्या तक्रारी तत्काळ सोडवण्यावर भर दिला जात असून, सुट्टीच्या दिवशीदेखील कार्यालये सुरू ठेवण्यात येत आहेत. या योजनेचे चार महत्त्वाचे टप्पे आहेत. यामध्ये प्रामुख्याने १८ जुलै ते १५ ऑगस्ट या कालावधीत संपूर्ण मालमत्ता कर एकरकमी भरल्यास शास्तीमध्ये ९० टक्के सूट मिळणार आहे. तसेच १६ ते ३१ ऑगस्ट या कालाधीत संपूर्ण मालमत्ता कर एकरकमी भरल्यास शास्तीमध्ये ७५ टक्के सूट मिळणार आहे. शिवाय पुढील काळात म्हणजे १ ते १० सप्टेंबर कालावधीत संपूर्ण मालमत्ता कर एकरकमी भरल्यास शास्तीमध्ये ५० टक्के सूट मिळणार आहे. तर ११ ते २० सप्टेंबर या कालाधीत संपूर्ण मालमत्ता कर एकरकमी भरल्यास असलेल्या शास्तीमध्ये २५ टक्के सूट मिळणार आहे. ही अभय योजना केवळ एकवेळची विशेष आणि अंतिम बाब म्हणून जाहीर करण्यात आली आहे.
...................
कोट
पनवेल पालिका क्षेत्रातील नागरिक मागील काही वर्षांपासून शास्ती माफीची मागणी करीत होते. याअनुषंगाने ‘अभय योजना’ चार टप्प्यांत लागू करण्यात आली आहे. ही योजना एकवेळची विशेष आणि अंतिम संधी आहे. नागरिकांनी तातडीने एकरकमी कर भरून याचा लाभ घ्यावा.
- स्वरूप खारगे, उपायुक्त, पनवेल महापालिका
...............
कालावधी सवलत (शास्तीमध्ये)
१८ जुलै ते १५ ऑगस्ट २०२५ ९०% सूट
१६ ऑगस्ट ते ३१ ऑगस्ट २०२५ ७५% सूट
१ ते १० सप्टेंबर २०२५ ५०% सूट
११ ते २० सप्टेंबर २०२५ २५% सूट