काळू धरण बुडीत क्षेत्रात बोगस घरपट्ट्यांचे पेव

मुरबाड, ता. २६ (बातमीदार) : तालुक्यातील काळू नदीवर होणाऱ्या धरण प्रकल्पाच्या बुडीत क्षेत्रात मोठ्या प्रमाणावर बोगस घरांची नोंद करून घरपट्टी आकारल्याचा गंभीर प्रकार उघडकीस आला आहे. याबाबत ठाणे जिल्हा परिषदेच्या मुख्य कार्यकारी अधिकाऱ्यांच्या आदेशानुसार चौकशी सुरू करण्यात आली आहे. याअंतर्गत, २८ जुलै रोजी ठाणे येथे भोरांडे गावचे सरपंच वैभव सरोगदे व तत्कालीन ग्रामपंचायत अधिकारी लकीचंद पाटील यांची चौकशी होणार आहे.
मुरबाड तालुक्यातील काळू नदीवर धरण बांधल्यामुळे तालुक्यातील उदाळ डोह, भोरांडे, खुटल, चासोळे, चासोळे खुर्द, आंबिवली, जडई, न्याहाडी, फांगलोशी, वाकलवाडी, करपटवाडी, तळेगाव, जडई, खरशेत, उमरोली, फांगणे, ऐनाचीवाडी, वाकलवाडी ही १८ गावे व २३ वाड्या बुडीत क्षेत्रात येणार आहेत. तसेच २५९.५४ हेक्टर खासगी जमीन पाण्याखाली जाणार आहे एकूण ७८७ कुटुंबातील ३१६९ लोक बाधित होणार आहेत.

दुहेरी लाभासाठी नोंदी?
बुडीत क्षेत्रातील घरांना नुकसान भरपाई , नोकरी असे दुहेरी लाभ मिळत असल्याने गेल्या दोन वर्षांत या धरणाच्या बुडीत क्षेत्रात मोठ्या प्रमाणात नवीन घरांची नोंद करण्यात आली आहे. या प्रकरणात ग्रामपंचायत अधिकाऱ्यांनी मोठ्या प्रमाणात कमाई केल्याची चर्चा आहे. अशा तक्रारी झाल्याने ठाणे जिल्हा परिषदेचे मुख्य कार्यकारी अधिकाऱ्यांनी तपासणीचे आदेश दिले होते.