‘यंदा बाप्पा शाडुचा’ या उपक्रमास विदयार्थ्यांचा उस्फुर्त प्रतिसाद

‘यंदा बाप्पा शाडूचा’ उपक्रमास विद्यार्थ्यांचा उत्स्फूर्त प्रतिसाद
कार्यशाळेत बालकलाकारांनी साकारले शाडूचे श्रीगणेश

कल्याण, ता. २६ (वार्ताहर) : पर्यावरणाचा समतोल राखण्यासाठी आणि जल प्रदूषणास आळा घालण्यासाठी नागरिकांनी गणेशोत्सवासाठी शाडू मातीचीच मूर्ती तयार करावी व खरेदी करावी, याकरिता ‘यंदा बाप्पा शाडूचा’ हा उपक्रम कल्याण-डोंबिवली महापालिकेच्या पर्यावरण व प्रदूषण विभागामार्फत राबविला जात आहे. गुरुवारी (ता. २४) महापालिकेच्या आचार्य अत्रे रंगमंदिरात विद्यार्थ्यांसाठी पर्यावरण व प्रदूषण नियंत्रण विभागाच्या कार्यकारी अभियंता रोहिणी लोकरे व उपअभियंता मुराई यांच्यामार्फत शाडू मूर्तीच्या कार्यशाळेचे आयोजन केले होते. या कार्यशाळेत विद्यार्थ्यांनी उत्स्फूर्त प्रतिसाद दिला.
संतोष जांभूळकर, गुणेश अडवाळ, शेखर ईश्वाद आणि सचिन गोडांबे या अनुभवी मूर्ती शिल्पकारांनी या कार्यशाळेत ‘आपणच आपला बाप्पा बनवा’ या ब्रीदवाक्यासोब‍त मार्गदर्शन केले. या कार्यशाळेत तब्बल ४०० विद्यार्थ्यांनी सहभाग घेतला होता. पालिका आयुक्त अभिनव गोयल यांनीदेखील शाडू मातीचीच मूर्ती का बनवावी, याबाबत विद्यार्थ्यांशी संवाद साधत प्रबोधन केले.
या कार्यशाळेत भाग्येश दहिवलकर (मोहिंदरसिंग काबूलसिंग शाळा), पूर्वा साबळे (गणेश बापूराव आघारकर शाळा), पूर्वेश काकडे, दिव्यराज कावरे (सुभेदार वाडा विद्यालय) यांस अनुक्रमे प्रथम, द्वितीय, तृतीय व उत्तेजनार्थ पारितोषिक देऊन मान्यवरांच्या हस्ते गौरविण्यात आले. या वेळी महापालिका आयुक्त अभिनव गोयल, मुख्य लेखा परीक्षक सुरेश बनसोडे, पर्यावरण व प्रदूषण नियंत्रण विभागाच्या कार्यकारी अभियंता रोहिणी लोकरे, शिक्षणाधिकारी विजय सरकटे, तसेच महापालिकेचे इतर अधिकारी, कर्मचारी उपस्थित होते.