माणगाव सुविधायुक्‍त समृद्ध शहर बनवणार

माणगाव सुविधायुक्‍त समृद्ध शहर बनवणार
तटकरे यांचे प्रतिपादन; पथदिव्यांच्या कामाचे भूमिपूजन
माणगाव, ता. २६ (बातमीदार) ः माणगाव हे रायगड जिल्ह्याचे मध्यवर्ती, भविष्यकालीन दृष्टीने अत्यंत महत्त्वाचे ठिकाण आहे. येथील विकासासाठी आम्ही कटिबद्ध आहोत. माणगावचे रूपांतर एक परिपूर्ण, सुविधायुक्त शहर म्हणून करण्यात येणार आहे, असे प्रतिपादन पेट्रोलियम व नैसर्गिक वायू समितीचे अध्यक्ष आणि खासदार सुनील तटकरे यांनी केले.
गेल लिमिटेडच्या सीएसआर निधीतून माणगाव नगरपंचायत हद्दीतील विविध ठिकाणी सोलार हायमास्ट व सौर पथदिवे बसविण्याच्या कामाचे भूमिपूजन खासदार तटकरे यांच्या हस्ते पार पडले. या वेळी आमदार अनिकेत तटकरे, माणगाव शिक्षण प्रसारक मंडळाचे अध्यक्ष ॲड. राजीव साबळे, राष्ट्रवादी काँग्रेसचे कार्याध्यक्ष सुभाष केकाणे, नगराध्यक्षा शर्मिला सुर्वे, उपनगराध्यक्षा हर्षदा काळे, युवक अध्यक्ष शादाब गैबी, माजी नगराध्यक्ष आनंद यादव, मुख्याधिकारी संतोष माळी, शहर अध्यक्ष नितीन वाढवळ, नगरसेवक व पदाधिकारी तसेच स्थानिक नागरिक मोठ्या संख्येने उपस्थित होते.
या वेळी खासदार तटकरे पुढे म्हणाले, की माणगाव शहराची वाहतूक कोंडी दूर करण्यासाठी प्रयत्न सुरू आहेत. बायपाससाठी निधी उपमुख्यमंत्री अजित पवार यांच्या माध्यमातून मंजूर झाला आहे. याशिवाय शैक्षणिक संस्थांच्या इमारती, अद्ययावत शाळा आणि खेळाडूंना आधुनिक क्रीडांगण उपलब्ध करून दिले जाणार आहे. २ ऑगस्ट रोजी मुख्यमंत्री अजित पवार माणगाव दौऱ्यावर येणार असून, त्या वेळी अनेक विकासकामांबाबत निर्णय घेतले जातील, असेही त्यांनी स्पष्ट केले. तर पर्यटकांची वाढती संख्या लक्षात घेता माणगाव शहराचा नियोजनबद्ध विस्तार अत्यंत महत्त्वाचा असून, पुढील काळात येथील विविध प्रकल्प पूर्णत्वास नेण्यात येतील, असे आश्वासन खासदार सुनील तटकरे यांनी दिले.