नवी मुंबई गुन्हे शाखेच्या उपायुक्तपदी सचिन गुंजाळ

नवी मुंबई गुन्हे शाखेच्या उपायुक्तपदी सचिन गुंजाळ
नवी मुंबई, ता. २६ (वार्ताहर) : नवी मुंबई पोलिस आयुक्तालया अंतर्गत नव्याने स्थापन झालेल्या बेलापूर (२) परिमंडळाचे उपायुक्त म्हणून अमित काळे यांची नियुक्ती करण्यात आली आहे. त्यामुळे पोलिस आयुक्त मिलिंद भारंबे यांनी रिक्त झालेल्या गुन्हे शाखेच्या उपायुक्तपदी मुंबईतून बदली होऊन आलेल्या सचिन गुंजाळ यांची नियुक्ती केली आहे.
नवी मुंबईतील झपाट्याने वाढणारी लोकसंख्या, नागरीकरण व कायदा-सुव्यवस्था आव्हांनाचा विचार करून राज्याच्या गृह विभागाने नुकतीच नवी मुंबई पोलिस आयुक्तालयाच्या पुनर्ररचनेला मंजुरी दिली आहे. त्यानुसार सध्याच्या परिमंडळ-१ (वाशी) व परिमंडळ-२ (पनवेल) यांच्या पुनर्ररचनेतून नवीन परिमंडळ-२ (बेलापूर)ची स्थापना करण्यात आली आहे. या नव्या परिमंडळाचे उपायुक्त म्हणून अमित काळे यांची नियुक्ती झाल्याने गुन्हे शाखेचे पद रिक्त झाले होते.
गृह विभागाने २५ जुलै रोजी काढलेल्या आदेशानुसार, मुंबई पोलिस दलातील पोलिस उपायुक्त सचिन गुंजाळ यांची नवी मुंबई पोलिस दलात बदली केली आहे. त्यानंतर नवी मुंबईचे पोलिस आयुक्त मिलिंद भारंबे यांनी सचिन गुंजाळ यांची गुन्हे शाखेच्या उपायुक्तपदी नियुक्ती केली आहे. नवी मुंबई पोलिस आयुक्तालयातील सर्वात महत्त्वाच्या पदांपैकी एक असलेल्या गुन्हे शाखेच्या उपायुक्त पदासाठी अनेक अधिकाऱ्यांमध्ये चढाओढ होती, ज्यात सचिन गुंजाळ यांनी बाजी मारली.