महाविद्यालयीन विद्यार्थ्याला १० लाखांचा गंडा

महाविद्यालयीन विद्यार्थ्याला १० लाखांचा गंडा
रामनगर पोलिस ठाण्यात गुन्हा दाखल
सकाळ वृत्तसेवा
डोंबिवली, ता. २७ : शहरातील एका १९ वर्षीय महाविद्यालयीन विद्यार्थ्याची १० लाख ९९ हजार रुपयांची फसवणूक झाल्याचा प्रकार उघडकीस आला आहे. अभियांत्रिकीचे शिक्षण घेत असलेल्या या विद्यार्थ्याची इंटर्नशिपच्या एका बनावट संकेतस्थळाच्या माध्यमातून ही फसवणूक झाली आहे. याप्रकरणी रामनगर पोलिस ठाण्यात गुन्हा दाखल करण्यात आला आहे.

डोंबिवली पूर्वेतील सुनीलनगर परिसरात हा मुलगा राहण्यास आहे. ८ जुलै २०१३ ते १३ जुलै २०२५ या कालावधीत हा फसवणुकीचा प्रकार घडला आहे. नवी मुंबई येथील एका महाविद्यालयात तो अभियांत्रिकीच्या दुसऱ्या वर्षाचे शिक्षण घेत आहे. शिक्षण घेत असताना इंटर्नशिप करावी म्हणून त्याने काही संकेतस्थळ तपासली. त्या वेळी एका संकेतस्थळावरील माहिती वाचल्यानंतर फसवणूक करणाऱ्यांनी मुलाला संबंधित संकेतस्थळावरील माहिती भरण्यास सांगितले. त्याला माहिती व एक पुस्तिका देण्यात आली. त्यामुळे हे अधिकृत संकेतस्थळ आहे, असे मुलाला वाटले. फसवणूक करणाऱ्यांनी मुलाला दोन लाख नऊ हजार शुल्क ऑनलाइन भरण्यास सांगितले गेले. मुलाने ती रक्कम भरल्यानंतर भामट्याने मुलाचा व्हॉट्सॲप नंबर ब्लॉक करून त्याला टेलिग्रामद्वारे दोन लाख ३० हजार रुपये भरणा केल्याशिवाय तुमची रक्कम परत मिळणार नाही, असे सांगितले. ही रक्कम भरणा केल्यानंतर तुमचा क्रेडिट स्कोर खूप कमी आहे. तुम्हाला तुमचे भरलेले शुल्क परत मिळण्यासाठी चार लाख ४० हजार रुपये भरणा करावे लागतील.

भरणा केलेले पैसे परत मिळवायचे असतील, तर वाढीव पाच लाख भरणा करण्याची मागणी भामटा करू लागला. पैसे भरणा केल्यानंतर पुन्हा तो पैशाची मागणी करत होता. जवळील पैसे संपल्यानंतर पुन्हा पाच लाखांची मागणी करण्यात आली. वाढीव पैसे कोठून द्यायचे, असा प्रश्न मुलाला पडला. मुलाने भरणा केलेली रक्कम परत करण्यासाठी भामट्याकडे तगादा लावला, मात्र त्याला प्रतिसाद मिळाला नाही. तेव्हा मुलाला संशय आला, त्याने टेलिग्रामचा पत्ता तपासला. त्या वेळी त्याला तो पत्ता बनावट असल्याचे आढळले. आपली फसवणूक झाल्याचे लक्षात येताच मुलाने रामनगर पोलिस ठाण्यात तक्रार दाखल केली.