वाशी येथे डेब्रीज टाकणाऱ्या २ डंपरवर सिडकोकडून कारवाई

वाशी येथे डेब्रीज टाकणाऱ्या दोन डंपरवर सिडकोकडून कारवाई
तुर्भे, ता. २७ (बातमीदार) ः सिडको महामंडळाच्या भूमीवर अनधिकृतपणे डेब्रीज टाकणाऱ्यांविरुद्ध मोहीम अधिक तीव्र केली आहे. त्यानुसार मुंबईहून नवी मुंबईमध्ये बेकायदा डेब्रिज वाहून नेणाऱ्या दोन डंपरवर वाशी टोलनाका येथे कारवाई करण्यात आली.
सिडको महामंडळाने संपादित केलेल्या तसेच संपादित करण्यात येत असलेल्या जमिनीवर किंवा भूखंडावर मोठ्या प्रमाणात अनधिकृतपणे डंपरचालकांकडून डेब्रिज टाकण्यात येत आहे. हे डेब्रिज मानवी आरोग्यास धोकादायक व पर्यावरणास हानिकारक असल्याचे निदर्शनास आले आहे. अनधिकृत डेब्रिजला आळा घालण्याच्या दृष्टीने मुख्य दक्षता अधिकारी सुरेश मेंगडे यांच्या नेतृत्वाखाली दक्षता तपास अधिकाऱ्यांनी सिडको कार्यक्षेत्रात मोहीम राबवली. या वेळी वाशी टोलनाका येथे पथक गेले असता त्यांना दोन डंपर आढळून आले. पोलिसांना पाहून ते डंपर रस्त्यावर सोडून चालक पळून गेले. डंपरचालक ईश्वर दिनू महतो आणि जलील फरदीन चुंगीवाले त्यांच्याविरुद्ध वाशी पोलिस ठाण्यात गुन्हा दाखल केला आहे. आरोपी हे डंपरमधील डेब्रिज नवी मुंबई आंतरराष्ट्रीय विमानतळ परिसरात व जासई, उलवे परिसरात खाली करण्यासाठी जाण्याच्या प्रयत्नात होते. सिडको परिक्षेत्रात अनधिकृत डेब्रीज टाकत असताना कोणी आढळल्यास सिडकोच्या अधिकृत वेबसाईटवर तसेच संबंधित पोलिस ठाण्यात माहिती द्यावी, असे आवाहन सुरेश मेंगडे यांनी केले आहे.