यंग स्टार ट्रस्ट तर्फे श्रावण सुंदरी २०२५ - सौंदर्यस्पर्धा

यंग स्टार ट्रस्टतर्फे श्रावण सुंदरी सौंदर्यस्पर्धा
महाराष्ट्रातील सौंदर्यवतींसाठी व्यासपीठ
विरार, ता. २७ (बातमीदार) ः यंग स्टार्स ट्रस्ट, विरार पुरस्कृत आणि वसई तालुका कला, क्रीडा विकास मंडळ आयोजित वामन हरी पेठे ज्वेलर्स ‘श्रावण सुंदरी २०२५’ स्पर्धा आयोजित केली आहे. यंदा स्पर्धेचे हे तिसरे वर्ष असून, ‘सकाळ तनिष्का’ हे माध्यम प्रायोजक आहेत.
आतापर्यंत राज्यातील विविध भागांतून तिन्ही गट मिळून १८९ स्पर्धकांनी आपला सहभाग नोंदवला आहे. महाराष्ट्रातून पालघर, मुंबई, ठाणे, नवी मुंबई, बीड, पुणे, नाशिक येथील स्पर्धकांनी सहभाग नोंदवला आहे. स्पर्धेसाठी परीक्षक म्हणून सिने, जाहिरात, दिग्दर्शक, अभिनेते, नृत्य दिग्दर्शक आदी काम पाहणार आहेत.
अभिनेता पुष्कर श्रोत्री यांनी सांगितले, की सौंदर्य गुण, आत्मविश्वास आणि सांस्कृतिक प्रतिभेचे सादरीकरण करण्याची उत्तम संधी देणारी सौंदर्य स्पर्धा आहे. अभिनेत्री प्राजक्ता माळीने सांगितले, की सर्व क्षेत्रांतील स्रियांनी सहभाग घेऊन आपल्या नव्या प्रवासाला सुरुवात करा. या स्पर्धेचे वैशिष्ट्य म्हणजे स्त्रीच्या सौंदर्यासोबतच तिच्या विचारांना आणि स्त्री-तत्त्वाला दाद दिली जाणार आहे. अभिनेता प्रथमेश परब म्हणाला, की स्त्रियांमधील अद्वितीयतेला नवा प्रकाश देणारी स्पर्धा, तर हास्य अभिनेता समीर चौघुले म्हणाले, की उत्कृष्ट नियोजन, पारदर्शक निवड आणि सांस्कृतिक भव्यता यामुळे या स्पर्धेने परंपरा निर्माण केली आहे. दरम्यान, माजी महापौर प्रविणा ठाकूर आणि वसई तालुका कला, क्रीडा विकास मंडळाचे सरचिटणीस प्रकाश वनमाळी यांच्या मार्गदर्शनाखाली युवा टीम आयोजनासाठी मेहनत घेत असून, प्रेक्षकांना उपस्थित राहण्याचे आवाहन करण्यात आले आहे.

तीन गटांमध्ये स्पर्धा
गट क्रमांक - १ मिस श्रावण सुंदरी वय १८ ते ३५ वर्षे, अविवाहित तसेच एकल महिलांसाठी, गट क्रमांक -२ मिसेस श्रावण सुंदरी वय १८ ते ३५ वर्षे, विवाहित महिलांसाठी. गट क्रमांक - ३ एलाईट श्रावण सुंदरी वय ३५ वर्षांवरील महिलांसाठी असणार आहे.

स्पर्धा एकूण दोन फेऱ्यांमध्ये
प्राथमिक पात्रता फेरी
फेरीचे स्वरूप - रॅम्प वॅाक, स्वपरिचय व कौशल्य फेरी ही गट क्रमांक - ३ शनिवार (ता. २) आणि गट क्रमांक-१ व २ यांसाठी रविवार (ता. ३) सकाळी ८.३० वाजता जुन्या विवा कॉलेजमध्ये स्पर्धा पार पडणार आहे.
अंतिम फेरी
फेरीचे स्वरूप - पारंपरिक व पाश्चिमात्य वेशभूषा व प्रश्नोत्तरे फेरी ही रविवारी (ता. १७) वसई पश्चिम स्टेला पेट्रोलपंपाच्या मागे ड्रीम अरीना हॉल दोस्तीमध्ये होणार आहे.