जाहिरात विभागाला लक्ष्मीदर्शन

जाहिरात विभागाला लक्ष्मीदर्शन
ठाणे पालिकेची मागील वर्षीच्या तुलनेत यंदा तीन कोटींची अधिकची वसुली
सकाळ वृत्तसेवा
ठाणे, ता. २८ : ठाणे महापालिकेच्या जाहिरात विभागाने अनधिकृत आणि थकीत होर्डिंगधारकांविरोधात कारवाईच्या हालचाली सुरू केल्या आहेत. त्यानुसार पालिकेच्या जाहिरात विभागाने थकीत होर्डिंगधारकांना नोटीस बजावणे, जाहिरात काढून टाकत कारवाईचा फास आवळल्यानंतर २५० होर्डिंगधारकांनी जुलै आतापर्यंत आठ कोटी ४७ लाखांच्या फीचा भरणा केला आहे. मागील वर्षीच्या तुलनेत यंदाही तीन कोटीने अधिक वाढ झाली आहे.
ठाणे महापालिका क्षेत्रात अनधिकृत होर्डिंग, फ्लेक्स आणि बॅनर्स यावर कडक कारवाई करत त्यांना हटविण्यात आले आहे. संबंधित जाहिरातदारांकडून दंड वसूल करण्यात येत आहे, अशातच ठाणे शहरात सध्याच्या घडीला २५० अधिकृत हार्डिंगधारक असून, या होर्डिंगधारकांकडून पालिकेला कर भरणा करावा लागत असतो. त्यानुसार मागील महिन्यांपासून यापैकी काही होर्डिंगधारकांकडे १५ ते २० कोटी थकीत आहेत. ही थकबाकी वसूल करण्यासाठी ठाणे पालिकेच्या जाहिरात विभागाकडून हालचाली सुरू करण्यात आल्या आहेत. ज्या जाहिरातदारांनी वेळेत शुल्क भरले नाही, अशा संस्थांनाही नोटिसा बजावण्यात आल्या आहेत, तर अनेक हार्डिंगवरील जाहिरातीदेखील उतरविण्याची कारवाई करण्यात आली.
----------------------------------------
उत्पन्नात वाढ
पालिकेच्या कारवाईमुळे होर्डिंगधारकांचे धाबे दणाणले आहेत. त्यानुसार एप्रिल २०२५ ते जुलै २०२५ या चार महिन्यांत आठ कोटी ४७ लाखांची होर्डिंगधारकांकडून फीवसुली करण्यात आली आहे. मागील वर्षी याच कालावधीत पाच कोटी ३१ लाख फीवसुली करण्यात आली होती. त्यामुळे मागील वर्षीच्या तुलनेत यंदाही वसुलीत तीन कोटींनी वाढ झाल्याचे दिसून येत आहे. त्यामुळे पालिकेच्या तिजोरीत थेट उत्पन्नवाढ होत आहे.
------------------------------------
कायदेशीर मार्गाने महसूल
दरम्यान, शहराचा चेहरा विद्रूप करणाऱ्या अनधिकृत जाहिरातींवर शून्य सहिष्णुतेचे धोरण राबविले जात आहे. अधिकृत परवाना नसलेल्या जाहिराती हटवून कायदेशीर मार्गाने महसूल वाढवण्याचा प्रयत्न करण्यात येत असल्याची माहिती जाहिरात विभागाने दिली.