थोरवेंना शह देण्यासाठी घारे यांची जिल्हाध्यक्षपदी नियुक्ती

थोरवेंना शह देण्यासाठी घारे यांची जिल्हाध्यक्षपदी नियुक्ती
खासदार सुनील तटकरे यांची राजकीय खेळी; महाड-पोलादपूरकडेही लक्ष
रोहा, ता. २८ (बातमीदार) ः राष्ट्रवादी काँग्रेसचे प्रदेशाध्यक्ष खासदार सुनील तटकरे यांनी पुन्हा एकदा ‘एका दगडात अनेक पक्षी’ अशा पद्धतीने राजकीय डाव खेळला आहे. कर्जत-खालापूर मतदारसंघातील शिवसेना (शिंदे गट) आमदार महेंद्र थोरवे यांना शह देण्यासाठी तटकरे यांनी कट्टर प्रतिस्पर्धी व माजी उमेदवार सुधाकर घारे यांना रायगड जिल्हाध्यक्षपदी बिनविरोध नियुक्त केले आहे.
तटकरे यांच्या या निर्णयामागे आगामी जिल्हा परिषद, पंचायत समिती व ग्रामपंचायत निवडणुकांमध्ये आपले वर्चस्व वाढवण्याचा स्पष्ट उद्देश असल्याचे बोलले जात आहे, याशिवाय महाड-पोलादपूर मतदारसंघातही पक्षाची पकड मजबूत करण्यासाठी तरुण नेते हनुमंत जगताप यांची पक्षाच्या प्रदेश सरचिटणीसपदी नेमणूक करण्यात आली आहे. या नियोजनाचा अधिकृत मुहूर्त रविवार, २७ जुलै रोजी सुतारवाडी (रोहे) येथे पार पडलेल्या कार्यकारिणी बैठकीत लागला. खासदार तटकरे यांच्या अध्यक्षतेखाली झालेल्या या बैठकीत माजी आमदार अनिकेत तटकरे, विजयराव मोरे, मुश्ताक अंतुले, सुभाष केकाणे, दत्तात्रय मसूरकर, उमा मुंढे, स्नेहल जगताप यांच्यासह शेकडो पदाधिकारी व कार्यकर्ते उपस्थित होते. या वेळी कार्यकर्त्यांमध्ये संवाद, संघटनबांधणी आणि निवडणूक तयारीवर विशेष भर देण्यात आला.
.............
राष्ट्रवादी काँग्रेसची राजकीय व्यूहरचना
दरम्यान, मावळते जिल्हाध्यक्ष मधुकर पाटील यांची पक्षाच्या प्रदेश उपाध्यक्षपदी बढती झाल्यानंतर घारे यांची निवड निश्चित झाली. विधानसभा निवडणुकीत थोरवेंना काटे की टक्कर दिल्यानंतर घारे यांनी स्थानिक पातळीवर जोरदार जनसंपर्क सुरू केला आहे. त्यांनी शिंदे गटाच्या नेत्यांवर दबाव वाढवण्यासाठी इतर पक्षांतील नेत्यांशीही गुप्त गाठीभेटी सुरू केल्याची माहिती मिळत आहे. या हालचालींमुळे रायगड जिल्ह्याच्या राजकारणात पुन्हा एकदा राष्ट्रवादी काँग्रेसची राजकीय व्यूहरचना अधिक आक्रमक होताना दिसत आहे. शिंदे गटाला थेट टक्कर देण्यासाठी राष्ट्रवादीचे सर्व गोट सज्ज झाले असून, येणाऱ्या निवडणुका ‘ईट का जवाब पत्थर से’ देणाऱ्या लढती ठरणार, असेच संकेत मिळत आहेत.