ट्रेलर बंद पडल्याने पाच तास वाहतुकीचा खोळंबा

ट्रेलर बंद पडल्याने पाच तास कोंडी
अंबरनाथ एमआयडीसी पाइपलाइन महामार्गावरील घटना
अंबरनाथ ता. २८ (वार्ताहर) : तांत्रिक बिघाडामुळे ट्रेलर बंद पडल्याने अंबरनाथमध्ये सुमारे पाच तास वाहतूक खोळंबली होती. वाहतूक पूर्ववत करण्यासाठी वाहतूक विभागाचे शर्थीचे प्रयत्न केले. ट्रेलरचालक व मालकाशी संपर्क साधून ट्रेलर मार्गातून हलवण्याचे काम हाती घेण्यात आले; मात्र यामुळे मार्गावरची वाहतूक काही काळ मंदावली होती.

अंबरनाथ येथील आनंदनगर एमआयडीसी पाइपलाइन परिसरातील पुलावर सकाळी साधारण साडेआठ ते नऊच्या सुमारास एक ट्रेलर बंद पडल्याने वाहतूक कोंडी झाली होती. रस्त्याच्या मधोमध चढणीवर हा ट्रेलर तांत्रिक बिघाडामुळे बंद पडल्याने मुंबई व नवी मुंबई दिशेने जाणारी वाहतूक काही काळ ठप्प झाली होती. या घटनेची माहिती मिळताच वाहतूक पोलिस घटनास्थळी दाखल झाले. वाहनचालक व मालकाशी संपर्क साधून ट्रेलर मार्गातून बाजूला करण्यासाठी शर्थीचे प्रयत्न सुरू केले; मात्र ऐन सकाळी रस्त्याच्या मधोमध ट्रेलर बंद पडल्याने सुमारे पाच तास वाहतूक खोळंबली होती. याचा फटका सकाळी कामावर जाण्यासाठी निघालेल्या वाहनचालक आणि नागरिकांना झाल्याने चालकांनी तीव्र नाराजी व्यक्त केली, तर हा ट्रेलर हटवण्यासाठी वाहतूक विभागाचे युद्धपातळीवर प्रयत्न सुरू असल्याची माहिती अधिकारी विजय पुराणिक यांनी दिली.