विरार मध्ये महिलांचा घागर घुमूदे चा आवज

विरारमध्ये ‘घागर घुमू दे’चा आवाज
यंग स्टार ट्रस्टच्या मंगळागौर स्पर्धेला मोठा प्रतिसाद

विरार, ता. २८ (बातमीदार) ः घागर घुमू दे, दिंड्या मोड गं पोरी यासारख्या गाण्यांवर नवविवाहितांबरोबरच इतर महिलांनीही ठेका धरला. यंग स्टार्स ट्रस्टचे अध्यक्ष माजी आमदार हितेंद्र ठाकूर आयोजित मंगळागौर स्पर्धा विरारमध्ये मोठ्या उत्साहात पार पडली. या स्पर्धेत ऐरोली, कांदिवली, मालाड, ठाणे, खोपोली, वसई, विरार येथील जवळपास ४० महिला संघांनी सहभाग घेतला होता. यंग स्टार ट्रस्ट समन्वयक अजीव पाटील यांच्या समन्वयातून कै. विद्या दयानंद पाटील व कै. भारती प्रदीप देशमुख यांच्या स्मृतिप्रीत्यर्थ स्पर्धेचे आयोजन करण्यात आले होते.
नवविवाहित आणि महिलांनी नववारी लुगडे, नाकात नथ व पारंपरिक दागिने घालून मंगळागौर सादर केल्या. नाच गं घुमा, फू बाई फू फुगडी, आगोटा पागोटा, गाठोडं, ऋणूझुणुत्या पाखरा जा रे माझ्या माहेरा, कोंबडा अशा पारंपरिक गाण्यांसह सासू-सुनेच भांडणं, लाट्या बाई लाट्या, अडवळ घूम पडवळ घूम, आगोटा पिगोटा, बस फुगडी, तवा फुगडी, फिंगरी फुगडी, वाकडी फुगडी असे वेगवेगळे प्रकार सादर केले.
महाराष्ट्रात मराठीचाच जयघोष, पर्यावरण, पाणी वाचवा, स्त्रीशक्ती, महिलांचे एकाकीपण, समानतेचा हक्क असे विविध संदेश स्पर्धेद्वारे देण्यात आले. या कार्यक्रमाचे परीक्षक म्हणून जयेश नारायण पाटील व दीपाली दवणे यांनी काम पाहिले. रविवारी (ता. २७) या स्पर्धेचे उद्‍घाटन माजी स्थायी समिती सभापती अजीव पाटील, प्रशांत राऊत, उत्कर्ष विद्यालयाच्या प्राचार्या मुग्धा लेले, माजी नगरसेविका सुरेखा कुरकुरे, मिलिंद पवार, मिलिंद पोंक्षे यांच्या उपस्थिती झाले. या वेळी प्रकाश वनमाळी, माजी नगरसेवक हार्दिक राऊत, माजी नगरसेविका मीनल पाटील, चिरायू चौधरी, हेमांगी पाटील, ज्योती राऊत, सरिता दुबे, झीनत शेख, ममता सुमन, प्रतिमा पाटील, प्रतिभा पाटील आदींनी उपस्थित लावली होती.

बक्षिसांचा पाऊस
दिवा ठाण्याच्या नवदुर्गा मंगळागौर ग्रुपने प्रथम क्रमांक पटकावला, तर विरारच्या सक्षमीकरण महिला मंडळ यांनी दुसरा क्रमांक, सहयोगी ग्रुप घाटकोपर तृतीय क्रमांक, तर उत्तेजनार्थ बक्षीस नवरंग आणि सुवर्ण संघाला मिळाले. विशेष बक्षिसे गौरीसखी, उपासना संघ, ज्येष्ठ नागरिक संघ यांना मिळाले. प्रत्येक संघाला रोख पारितोषिक सन्मानचिन्ह आणि पहिल्या तिन्ही क्रमांक असलेल्या प्रत्येक महिलेला पैठणी साडीने सन्मानित करण्यात आले.