कल्याण पूर्वेचे महेश गायकवाड यांची घरवापसी

कल्याण पूर्वेचे महेश गायकवाड यांची घरवापसी
शिवसेना शिंदे गटात लवकरच महत्त्वाच्या पदावर वर्णी ः भोईर यांचे वक्तव्य चर्चेत
सकाळ वृत्तसेवा
डोंबिवली, ता. २८ ः कल्याण पूर्वेतील शिवसेना शिंदे गटाचे शहरप्रमुख असलेले महेश गायकवाड यांची विधानसभा निवडणूक काळात पक्षातून हकालपट्टी केली होती. पक्षातून हकालपट्टी झाल्यानंतरही महेश गायकवाड हे उपमुख्यमंत्री एकनाथ शिंदे, खासदार डॉ. श्रीकांत शिंदे यांच्या विविध कार्यक्रमात दिसून येत होते. यानंतर आता आमदार विश्वनाथ भोईर यांनी गायकवाडांची लवकरच शिंदे गटात महत्त्वाच्या पदावर वर्णी लागणार आहे, चिंतेचे कारण नाही, असे म्हणत त्यांच्या घरवापसीवर शिक्कामोर्तब केले आहे. यामुळे राजकीय चर्चांना उधाण आले आहे.
कल्याण पूर्वेतील सांस्कृतिक गणेशोत्सव महामंडळातर्फे गणेश मंडळांसाठी स्पर्धा आयोजित केल्या होत्या. यात सहभागी गणेश मंडळांचा गौरव करून बक्षीस वितरण करण्यात आले. या वेळी विश्वनाथ भोईर यांनी महेश गायकवाड यांच्यावर कौतुकाचा वर्षाव केला.
कल्याण पूर्वेतून विधानसभा निवडणूक लढवण्यासाठी महेश गायकवाड हे इच्छुक होते, मात्र भाजप शिवसेना शिंदे गटाची युती असल्याने कल्याण पूर्वेची जागा भाजपच्या गोटात गेली. माजी आमदार गणपत गायकवाड यांच्याशी असलेले वैर, त्यात त्यांच्या पत्नीला मिळालेली उमेदवारी यामुळे महेश गायकवाड हे नाराज झाले होते. त्यांनी पक्षाच्या विरोधात भूमिका घेत भाजप उमेदवारास विरोध करण्यास सुरुवात केली. यामुळे त्यांची शिवसेना शिंदे गटातून हकालपट्टी करण्यात आली. तरी गायकवाड यांनी अपक्ष उभे राहात निवडणूक लढवली. यात त्यांना पराभव स्वीकारावा लागला.

केवळ कागदोपत्री हकालपट्टी
निवडणुका पार पडल्यानंतर महेश गायकवाड हे शिवसेना शिंदे गटातच सक्रिय असल्याचे दिसून येत होते. एकनाथ शिंदे व श्रीकांत शिंदे यांच्या पाठी फिरताना ते सातत्याने दिसून येत होते. यामुळे त्यांची पक्षातून कागदोपत्री केवळ हकालपट्टी झाली होती. महेश हे अपक्ष निवडणूक लढले तरी मनातून ते शिंदे गटातच होते यांसह अनेक राजकीय चर्चांना उधाण आले आहे.

विरोधकांना शह देण्यासाठी शिंदे गटाकडून हालचाली
भोईर यांनी केलेल्या वक्तव्यानंतर आगामी स्थानिक स्वराज्य निवडणुकांत इतर पक्षांना शह देण्यासाठी शिंदे गटाकडून हालचाली सुरू झाल्या आहेत. नाराज पदाधिकाऱ्यांना पक्षात मानाचे पद देऊन त्यांना पुन्हा सक्रिय करण्यासाठी पक्षातील वरिष्ठांनी हालचाली सुरू केल्या असल्याचे दिसून येत आहे.