नव्या हंगामाची कोळीवाड्यांत लगबग

उरण, ता. २८ (वार्ताहर)ः केंद्र, राज्य शासनाने १ जून ते ३१ जुलैपर्यंत खोल समुद्रात मासेमारी बंदीचे आदेश जारी केले होते. ही बंदी १ ऑगस्टपासून संपणार असल्याने कोळी बांधव नव्या हंगामाच्या तयारीला लागले आहेत.
मासेमारी बंदीमुळे हजारो बोटी गेल्या दोन महिन्यांपासून करंजा, मोरा, रेवस, केळवणे, दिघोडे, खारपाडा बंदरात नांगर टाकून उभ्या आहेत. कोळी बांधवांनी बोटींची डागडुजी, रंगरंगोटीची कामे आटोपल्यानंतर आता बोटीत जाळी ठेवण्याची कामे सुरू केली आहेत. त्यामुळे सर्वत्र बंदरात कोळी बांधवांची लगबग सुरू झाली आहे. दोन महिन्यांनंतर मासेमारीला जाणार असल्याने बोटींची पूजा केली जात आहे. तसेच मोठ्या प्रमाणात मासळी मिळणार असल्याने कुटुंबाची होणारी परवडही थांबणार आहे.