कासा येथील शिवमंदिरात गर्दी

कासा (बातमीदार) : श्रावण म्हणजे भक्ती, उपासना आणि शिवभक्तांसाठी विशेष महत्त्वाचा काळ. याच पार्श्वभूमीवर डहाणू तालुक्यातील कासा गावातील पुरातन शिवमंदिरात सध्या भक्तांची मोठी गर्दी उसळत आहे. सोमवार, गुरुवार आणि शनिवार या दिवशी मंदिरात दर्शनासाठी भाविकांची मोठी रांग लागते. आजही भाविकांनी दर्शनासाठी मोठी गर्दी केली होती.

कासा गावातील शिवमंदिरात पहाटेपासूनच येथे भाविक अभिषेकासाठी पिंडीवर दूध, पाणी, बेल, फूल अर्पण करत असून, अनेक दूधविक्रेते दररोज मंदिरात येऊन पिंडीवर दूध अर्पण करतात. मंदिरातील शिवपिंडी ही विशेष आकर्षणाचे केंद्र असून, श्रद्धेने नटलेला भक्तगण तासनतास रांगेत उभा राहात आहे. या मंदिराचे काही वर्षांपूर्वी नव्याने बांधकाम करण्यात आले असून, परिसरात भव्य सभामंडप आणि स्टेजची व्यवस्था आहे.