नेरूळमध्ये लॅपटॉपच्या ऐवजी मिळाला काचेचा तुकडा

नेरूळमध्ये लॅपटॉपऐवजी मिळाला काचेचा तुकडा
नवी मुंबई, ता. २८ (वार्ताहर) : ॲमेझॉन या ऑनलाइन शॉपिंग साइटवरून ३५ हजार रुपये किंमतीचा लॅपटॉप मागविणाऱ्या एका व्यावसायिकाला पार्सलमधून लॅपटॉपऐवजी काळ्या रंगाचा काचेचा वजन काटा आल्याचे उघडकीस आले आहे. हे पार्सल आणून देणाऱ्या डिलिव्हरी बॉयने हा प्रकार केल्याचा संशय व्यक्त करण्यात येत आहे. त्यानुसार नेरूळ पोलिसांनी या प्रकरणात अज्ञात व्यक्तीविरोधात फसवणुकीचा गुन्हा दाखल करून तपासाला सुरुवात केली आहे.
या प्रकरणातील तक्रारदार व्यावसायिक प्रदीप मेहता हे नेरूळ सेक्टर-१५ मध्ये कुटुंबासह राहण्यास आहे. मेहता यांनी गत २९ एप्रिल रोजी ॲमेझॉन अ‍ॅपद्वारे लॅपटॉप बुक केला होता. तसेच लॅपटॉपचे ३५ हजार रुपये ऑनलाइन पाठवून दिले होते. हा लॅपटॉप १ मे रोजी सायंकाळी ८ वाजता मेहता यांच्या घरी डिलिव्हर झाला. त्या वेळी मेहता पुण्यात असल्याने त्यांच्या पत्नीने ओटीपी देऊन पार्सल स्वीकारले होते, मात्र मेहता यांनी २ मे रोजी दुपारी ॲमेझॉनकडून आलेले पार्सल उघडल्यानंतर त्यात लॅपटॉपऐवजी काळ्या रंगाचा काचेचा वजन काटा आढळून आला. त्यानंतर मेहता यांनी तत्काळ ॲमेझॉनकडे ई-मेल व ऑनलाइन तक्रार नोंदवली, परंतु आजपर्यंत त्यांना लॅपटॉप मिळालेला नाही. तसेच त्यांचे पैसेदेखील त्यांना परत मिळालेले नाहीत. त्यामुळे त्यांनी ॲमेझॉनवर आर्थिक फसवणुकीचा आरोप करत नेरूळ पोलिस ठाण्यात तक्रार दाखल केली आहे. त्यानुसार पोलिसांनी अज्ञात व्यक्तीविरोधात गुन्हा दाखल करून तपासाला सुरुवात केली आहे.