पालघरनगरीत ‘हर हर महादेव’चा नारा

वसई, ता. २८ (बातमीदार) : श्रावण सोमवारनिमित्त पालघर जिल्ह्यातील विविध महादेव मंदिरांत आज (ता. २८) भाविकांची गर्दी उसळली होती. या वेळी धार्मिक कार्यक्रमाचे आयोजनदेखील ठिकठिकाणी करण्यात आले असल्याचे दिसून आले. पालघर नगरीत ‘हर हर महादेव’, ‘बम बम बोले’ असा नारा गुंजत होता.

वसई पूर्वेकडील तुंगारेश्वर, निर्मळ, सोपारा यासह पालघर परिसरात येथे पुरातन महादेव मंदिरे आहेत. पवित्र श्रावणाच्या पहिल्या सोमवारी शिवभक्त महादेवाचे दर्शन घेण्यासाठी मंदिरात गेले होते. शंकराच्या पिंडीला महाभिषेक, जलाभिषेक, दुग्धाभिषेक करण्यात आला, तसेच शिवतांडव, शिव स्तोत्र, महाआरती, भजन, कीर्तनात भाविक नागरिक न्हाऊन निघाले. गैरसोय होऊ नये, म्हणून मंदिर ट्रस्टकडून भाविकांसाठी चोख बंदोबस्त ठेवण्यात आला होता. या वेळी जागोजागी महाप्रसाद, भक्तांसाठी पाण्याची व्यवस्थादेखील सामाजिक संघटनांकडून करण्यात आली होती. वसई पश्चिमेकडील दक्षिणमुखी हनुमान मंदिर येथून पायी तुंगारेश्वरपर्यंत कावड यात्रा काढण्यात आली. या वेळी आमदार स्नेहा दुबे, माजी महापौर राजीव पाटील, माजी महापौर नारायण मानकर यांच्यासह मोठ्या संख्येने भाविक सहभागी झाले होते.