भिवंडीतील जैन मंदिरात चोरी

भिवंडीतील जैन मंदिरात चोरी
एक लाख ८५ हजारांचे दागिने हस्तगत; आरोपीला १२ तासांत अटक
भिवंडी, ता. २८ (वार्ताहर) : शहरात मोठ्या प्रमाणात घरफोडीच्या गुन्ह्यांमध्ये वाढ होत आहे. त्यातच अशोक नगर या शहराच्या मुख्य वर्दळीच्या भागात असलेल्या रहिवासी क्षेत्रातील जैन मंदिरात झालेल्या चोरीचा छडा लावण्यात शांतीनगर पोलिसांना यश मिळाले आहे. अवघ्या १२ तासांत पोलिसांनी आरोपीला अटक केली आहे. अशी माहिती शांतीनगर पोलिस ठाण्याचे वरिष्ठ पोलिस निरीक्षक विनायक गायकवाड यांनी दिली आहे.

पोलिसांनी दिलेल्या माहितीनुसार अशोक नगर येथील जैन मंदिरात शनिवारी पहाटेच्या सुमारास मंदिराचा दरवाजा तोडून आत शिरलेल्या अज्ञात चोरट्याने मंदिरातील एक लाख ८५ हजार रुपये किमतीचे चांदी व पितळेचे साहित्य चोरी केले होते. मंदिराचे विश्वस्त शांतीलाल गडा यांनी याबाबत शांतीनगर पोलिस ठाण्यात तक्रार दिली होती.

सहाय्यक पोलिस निरीक्षक योगेश गायकर यांच्या नेतृत्वाखाली पोलिस पथकाने मंदिरासह परिसरातील सीसीटीव्हीची तपासणी केली, यात संशयित आरोपीचा चेहरा स्पष्ट झाला. त्यानंतर गुप्त बातमीदाराकडून माहिती घेत साकीब उर्फ सलमान अख्तर याला शिताफीने ताब्यात घेतले, त्याची चौकशी केली असता त्याने चोरीची कबुली दिली. त्याच्याजवळून चोरीचा संपूर्ण मुद्देमाल जप्त करण्यात शांतीनगर पोलिसांना यश मिळाले आहे.