घणसोली, कोपरखैरणेपर्यंतचा प्रवास सुसह्य

वाशी, ता. २८ (बातमीदार)ः वाशीकडून ठाण्याकडे जाणाऱ्या मार्गावर महापे येथून कोपरखैरणेला जोडणाऱ्या उड्डाणपुलाची मार्गिका बनवण्यात येणार आहे. यासाठी पालिकेने निविदा काढली असून, दोन ठेकेदारांनी प्रतिसाद दिला आहे. त्यामुळे हा उड्डाणपूल झाल्यांनतर कोपरखैरणेतील भुयारी मार्गात होणारी वाहतूक कोंडी सुटणार आहे.
ठाणे-बेलापूर मार्गाच्या समांतर ट्रान्स हार्बर मार्गाच्या पूर्वेला एमआयडीसी तसेच पश्चिमेला सिडको वसाहत आहे. पूर्वेकडे असणाऱ्या सिडको वसाहतीमध्ये जाण्यासाठी येथे उड्डाणपूल तसेच भुयारी मार्ग बांधण्यात आलेले आहेत, पण कोपरखैरणे येथे बांधण्यात आलेल्या भुयारी मार्गातून बस तसेच अवजड वाहने जात नसल्यामुळे एकाच मार्गिकेमुळे येथे वाहतूक कोंडी होते, तर कोपरखैरणेमध्ये जाण्यासाठी कोपरीवरून किंवा घणसोली मार्गावरून पाच ते सहा किलोमीटरचा फेरा मारावा लागतो. अन्यथा महापे येथील असणाऱ्या उड्डणपुलांवरून जावे लागते, मात्र आता कोपरखैरणेवरून महापे उड्डाणपुलाला मार्गिका जोडल्यांनतर महापे, कोपरखैरणे, घणसोलीतील वाहतूक कोंडी सुटेल. तसेच उन्नत मार्गाकडे जाणाऱ्या वाहनांना लाभ होईल.
----------------------------------
उड्डाणपुलाची वैशिष्ट्ये
लांबी - ४३१ मीटर
रुंदी - ८.५० मीटर
------------------------------------
दोन किलोमीटरचा वळसा
महापे उड्डाणपुलावरून उतरण्यासाठी मार्गिका नसल्यामुळे एमआयडीसीमधील रसत्यावरून पुन्हा यूटर्न घेऊन ठाणे-बेलापूर मार्गावर वाहनचालकांना जावे लागते. यामुळे जवळपास वाहनचालकांना दोन किलोमीटरचा वळसा घालावा लागत आहे.
-----------------------------------
कोपरखैरणेवरून महापे उड्डाणपुलाच्या मार्गिकला जोडणाऱ्या मार्गिकेची निविदा काढली आहे. त्याला दोन कंत्राटदारांनी प्रतिसाद दिला आहे. पात्र ठरणाऱ्या ठेकेदाराला काम देण्यात येणार असून, मार्गिकेमुळे कोपरखैरणेतील वाहतूक कोंडी सुटणार आहे.
-शिरीष आरदवाड, शहर अंभियता, नवी मुंबई महापालिका