कल्याण पूर्वेत सार्वजनिक रस्ते मोकळे करण्यावर महापालिकेचा भर

रस्त्यांनी घेतला मोकळा श्वास
कल्याण पूर्वेत रस्ते मोकळे करण्यावर पालिकेचा भर
कल्याण, ता. २८ (बातमीदार) : महापालिकेमार्फत कल्याण पूर्व पाच/ड प्रभागातील प्रमुख रस्त्यांवरील अतिक्रमण दूर करण्यासाठी दररोज अतिक्रमण विरोधी विभागामार्फत कारवाई करण्यात येत आहे. या कारवाईत आतापर्यंत एकूण ४१ हातगाड्या, पाच छत्र्या व तीन गॅस सिलिंडर जप्त करण्यात आले असल्याची माहिती मिळाली आहे. नागरिकांच्या सुरक्षिततेसह वाहतुकीस अडथळा येऊ नये यासाठी रस्ते मोकळे ठेवण्यावर विशेष भर असल्याचे या वेळी महापालिकेकडून सांगितले जात आहे.
कल्याण पूर्व हा दाट लोकवस्ती व अरुंद रस्ते असलेला भाग म्हणून ओळखला जातो. शहरातील अंतर्गत रस्त्यांवर वाहतुकीचा पूर्णपणे बोजवारा उडाला आहे. याही परिस्थितीत अनधिकृत फेरीवाले अतिक्रमण करत रस्त्यावर आपले बस्तान मांडून व्यवसाय करतात. त्यामुळे वाहतुकीला मोठा अडथळा निर्माण होतो. याच दृष्टीने ५-ड प्रभाग क्षेत्राचे सहाय्यक आयुक्त उमेश यमगर यांनी आता कारवाईचा बडगा उगारला असून रस्त्यावरील अतिक्रमणे हटविण्याचे काम हाती घेतले आहे.
ही मोहीम केवळ एका प्रभाग क्षेत्रापुरती मर्यादित न राहता संपूर्ण कल्याण पूर्वेतच राबविली जावी, अशी मागणी नागरिकांकडून केली जात आहे. विशेषतः चार-जे प्रभाग क्षेत्रांतर्गत कोळसेवाडी येथील अपूर्ण कामे झालेल्या रस्त्यांवर अनधिकृत फेरीवाल्यांनी अक्षरशः उच्छाद मांडला असून, सायंकाळी येथून वाहन चालवणे दूरच, परंतु पायी चालणेदेखील त्रासदायक होऊन बसले आहे. त्यामुळे प्रभाग क्षेत्र अधिकाऱ्यांनी गांभीर्याने लक्ष द्यावे, अशी मागणी नागरिकांमार्फत केली जात आहे.