१५ गुन्ह्यांचा सराईत चोर गजाआड

उल्हासनगर, ता. २८ (वार्ताहर) : उल्हासनगरच्या टिल्सन मार्केट परिसरात दुकानफोडी करून ४४ हजारांचा मुद्देमाल लंपास केल्याची घटना उघडकीस आली आहे. मध्यवर्ती पोलिस ठाण्याच्या गुन्हे शोध पथकाने अल्पावधीत आरोपीला बेड्या ठोकल्या आहेत. यापूर्वी त्याने १५ घरफोड्या केल्याचे उघड झाले आहे.

टिल्सन मार्केट येथील ‘शगुन वेंचर’ या दुकानात चोरट्याने शटर उचकटून चोरी केल्याची घटना २४ जुलैच्या मध्यरात्री घडली. या घरफोडीत चोरट्याने दुकानातून लॅपटॉप, पेन ड्राईव्ह, मेमरी कार्ड आणि रोख रक्कम असा एकूण ४४ हजार रुपयांचा मुद्देमाल लंपास केला होता. याप्रकरणी दुकानदार रवी सुंदर पहुजा यांच्या तक्रारीवरून गुन्हा दाखल केला होता. या घटनेचा तपास करताना वरिष्ठ पोलिस निरीक्षक शंकर अवताडे यांच्या मार्गदर्शनाखाली गुन्हे शोध पथकाचे अधिकारी सहाय्यक पोलिस निरीक्षक राकेश शेवाळे, पोलिस उपनिरीक्षक संजय चव्हाण, प्रमोद जाधव, सचिन पाटील, वैजनाथ राख, सुशांत हांडे देशमुख आणि नीलेश नागरे यांनी सीसीटीव्ही फुटेजच्या मदतीने तपास सुरू केला. त्याचबरोबर पोलिस अंमलदार वैजनाथ राख व सुशांत हांडे देशमुख यांना मिळालेल्या माहितीच्या आधारे संशयित आरोपी राहुल टाक (वय ४१) याला ताब्यात घेण्यात आले.
पोलिसांनी त्याच्याकडून ३२,६०० रुपयांचा मुद्देमाल हस्तगत केला आहे. ज्यामध्ये लॅपटॉप, पेन ड्राईव्ह व मेमरी कार्ड यांचा समावेश आहे. विशेष म्हणजे, राहुल टाक हा सराईत गुन्हेगार असून, या आधी त्याच्यावर १५ घरफोड्यांचे गुन्हे दाखल असल्याची माहिती वरिष्ठ पोलिस निरीक्षक शंकर अवताडे यांनी दिली आहे. मध्यवर्ती पोलिसांच्या तत्पर कारवाईमुळे स्थानिक व्यापाऱ्यांमध्ये समाधान व्यक्त करण्यात येत आहे.