विजेच्या झटक्याने १७ वर्षीय तरुणाचा मृत्यू

विजेच्या झटक्याने १७ वर्षीय तरुणाचा मृत्यू
उल्हासनगर, ता. २८ (वार्ताहर) : छतावरून घरात पडणारे पावसाचे पाणी थांबवण्यासाठी तो गेला; मात्र विजेच्या झटक्याने त्याचा मृत्यू झाला. ही हृदयद्रावक घटना उल्हासनगरात घडली. उल्हासनगर कॅम्प क्रमांक २ जवळील शास्त्रीनगर परिसरातील पंजाबी कॉलनीमध्ये सोमवारी (ता. २८) दुपारी बाराच्या सुमारास १७ वर्षीय आयुष रॉय हा आपल्या वडिलांसोबत घराच्या गळणाऱ्या छतावर प्लॅस्टिक टाकण्यासाठी गेला होता. या वेळी त्याचा स्पर्श उघड्या विजेच्या तारांना झाला. यात त्याला तीव्र स्वरूपाचा विजेचा शॉक बसला. काही क्षणांतच आयुष बेशुद्ध पडला. तातडीने त्याला मध्यवर्ती रुग्णालयात दाखल करण्यात आले, परंतु डॉक्टरांनी त्याला मृत घोषित केले.

कुटुंबीयांसह स्थानिक नागरिकांनी महावितरण विभागाच्या निष्काळजीपणावर तीव्र संताप व्यक्त केला. मृत आयुषच्या नातेवाइकांनी सांगितले की, छतावरून गेलेल्या उघड्या विजेच्या तारांविषयी त्यांनी यापूर्वीच महावितरणकडे तक्रार केली होती; मात्र त्या तक्रारीची दखल घेतली गेली नाही. कोणताही अधिकारी वा कर्मचारी पाहणीसाठी घटनास्थळी आला नव्हता. याच निष्काळजीपणामुळे एका निष्पाप विद्यार्थ्याचा बळी गेला, असा संताप नागरिकांनी व्यक्त केला. या घटनेमुळे संपूर्ण परिसरात शोककळा पसरली आहे. शेजारीपाजारी, मित्रमंडळी आणि नागरिकांनी घरासमोर एकत्र येऊन महावितरणच्या विरोधात तीव्र नाराजी व्यक्त केली. काही नागरिकांनी तर दोषी अधिकाऱ्यांवर गुन्हा दाखल करण्याची मागणी केली आहे.

आंदोलनाचा इशारा
महावितरण विभागाकडून कोणतीही अधिकृत प्रतिक्रिया आली नाही; मात्र या प्रकारामुळे वीज सुरक्षेच्या मुद्द्यावर प्रश्नचिन्ह उपस्थित झाले आहे. या प्रकरणातील दोषींवर कठोर कारवाई केली नाही, तर प्रशासनाविरोधात तीव्र जनआंदोलन छेडण्याचा इशारा स्थानिक नागरिकांनी दिला आहे.