विक्रमगडमधील शिवमंदिरात गर्दी

विक्रमगड (बातमीदार) : श्रावणातील पहिला सोमवार मंदिरांमधील गर्दीचा ठरला. भाविकांनी शिवमंदिरात मोठ्या संख्येने दर्शनासह अभिषेकासाठी गर्दी केली होती. श्रावणातील पहिल्या सोमवारचा योग साधत भाविकांनी पहाटेपासूनच शिवमंदिरांत दर्शनासाठी गर्दी केली होती. विक्रमगडचे पंतगेश्वर महादेव मंदिरामध्ये भाविकांच्या लांबलचक रांगा लागल्या होत्या.

श्रावणात मांसाहार वर्ज असल्याने बाजारात फळे, भाजीपाला व फुलांच्या किमती वाढलेल्या दिसत आहे, मात्र गावागावात भक्तिमय वातावरण निर्माण झाले आहे. ठिकठिकाणच्या मंदिरामध्ये हरिनाम सप्ताह सुरू असून, हरिविजय, पांडवप्रताप, घराघरामध्ये नवनाथ अशा ग्रंथाचे पारायण सुरू आहे. चारही श्रावणी सोमवारनिमित्त शिवलीलालमृताचे पारायण सुरू आहे.

शिवमंदिरात भाविकांची मोठी गर्दी
वाडा (बातमीदार) : कुडूस, कोंढले, नारे, घोडमाळ, नागनाथ मंदिर व तिलसेश्वर येथे श्रावणी सोमवारनिमित्त मध्यरात्रीपासूनच अभिषेक व सर्पदर्शन घेण्यासाठी शिवमंदिरात शिवभक्तांची मोठी गर्दी दिसून आली. शिवभक्तांना कोणताही त्रास होऊ नये, म्हणून ग्रामस्थ व मंदिर प्रशासनाने विशेष खबरदारी घेतली होती. श्रावणी सोमवारनिमित्त वाडा तालुक्यातील शिवमंदिरे भाविकांनी गजबजून गेली होती. भाविकांनी दर्शनासाठी लांबच लांब रांगा लावल्याच्या पाहावयास मिळाल्या. दर्शनासाठी आलेल्या भाविकांना मंदिरात बैठक व पाणी व्यवस्था करण्यात आल्याची माहिती श्री हनुमान गावदेवी मंदिर ट्रस्टचे संचालक संतोष चौधरी यांनी दिली.