खर्डी-दळखन गावाला जोडण्यासाठी उड्डाणपूल मंजूर

शहापूर, ता. २८ (वार्ताहर) : शहापूर तालुक्यातील खर्डी व पलिकडे असलेल्या दळखन गावाला जोडण्यासाठी रेल्वे फाटकावर उड्डाणपूल मंजूर करण्यात आला आहे. त्यामुळे प्रवाशांच्या वेळेत बचत होणार आहे. या आधी रेल्वे फाटक उघडेपर्यंत प्रतीक्षा करावी लागत होती. उड्डाणपूल होण्यासाठी खर्डी पंचक्रोशीतील ग्रामस्थ सतत मागणी करत होते. खासदार सुरेश म्हात्रे यांनी पाठपुरावाही केला होता. अखेर उड्डाणपूल मंजूर झाल्याचे पत्र रेल्वे बोर्डाचे प्रधान कार्यकारी संचालक रवींद्र गोयल यांनी जारी केले आहे.
खर्डी स्थानकाच्या पूर्वेला दळखन, धामणी, जरंडी, काष्टी व चांदे ही गावे आणि पाडे आहेत. या गावांतील नागरिकांना प्रवास करायचा झाल्यास रेल्वेस्थानकानजीक असलेले फाटक ओलांडून यावे लागते. खर्डी गावात मुख्य बाजारपेठ असल्याने सर्वच गावे या बाजारपेठेवर अवलंबून आहेत. रेल्वे मार्गावर लोकल, एक्स्प्रेस व मालगाड्या सारख्या धावत असल्याने फाटक नेहमी तासन् तास बंद असते; परिणामी दवाखान्यात, शासकीय कार्यालयात, शाळेत व अनेक महत्त्वांच्या कामासाठी, बाहेरगावी जाण्यासाठी निघालेल्या नागरिकांना अडकून राहावे होते. अतिगंभीर रुग्ण व प्रसूतीसाठी जात असलेल्या महिलांना उपचार मिळण्यास उशीर होत असल्याने जीविताला धोका निर्माण झाला होता. आता उड्डाणपूल मंजूर झाल्याने रेल्वे फाटकाचा अडसर दूर झाला आहे.

खर्डी रेल्वेस्थानकाजवळील दळखण, धामणी व उबरखांड यांसह अन्य गावांना जोडणाऱ्या फाटकावर उड्डाणपूल होणार असल्याने येथील वाहनधारकांची समस्या कायमची दूर होणार आहे. यासाठी रेल्वे बोर्डाच्या अधिकाऱ्यांशी समस्याबाबत चर्चा करून सातत्याने पाठपुरावा केल्याने मंजुरी मिळाली आहे.
- सुरेश म्हात्रे, खासदार

शहापूर : खर्डी रेल्वे स्थानकाजवळचे खर्डी व दळखन या दोन गावांमधले रेल्वे फाटक