अंबरनाथमध्ये रस्ते कामाला सुरुवात

अंबरनाथ, ता. २८ (वार्ताहर) : अंबरनाथ शहर प्रगतिपथावर असला तरी काही ठिकाणी मात्र विकासाच्या नावाने खणखणाट पाहायला मिळतो. मात्र, आता रस्ते कामाला सुरुवात झाल्यानंतर यामध्ये कोणीही अडथळा निर्माण करू नका? अशी भावना रस्ते भूमिपूजनप्रसंगी महिलांनी व्यक्त केली. रस्त्यामुळे इतर सुविधाही लवकरच मिळतील, अशी अपेक्षा व्यक्त केली.
अंबरनाथ पूर्व प्रकाशनगर येथे गोरगरीब नागरिकांची मोठ्या प्रमाणात वस्ती आहे. अनेक वर्षांपासून येथील नागरिक रस्ता, गटार, शौचालय, पथदिवे अशा सोयी-सुविधांपासून वंचित आहेत. अनेकदा गटार तुंबून घाण पाणी येथील नागरिकांच्या घरात शिरते. त्याचबरोबर किडे, मुंग्या, उंदीर, घुशी घरात घुसून नासाडी करतात. स्वच्छता व सोयी-सुविधांअभावी नागरिक आजाराने व रोगराईने त्रासले आहेत. पथदिवे नसल्याने वस्तीतील नागरिक पडून गंभीर जखमी झाल्याच्या घटना घडल्या आहेत. या समस्यांना घेऊन नागरिकांनी अनेकदा आंदोलन, मोर्चे काढले. मात्र कोणत्याही प्रतिनिधी व प्रशासकीय अधिकाऱ्यांनी दखल घेतली नाही. अखेर भालचंद्र भोईर प्रतिष्ठानने पाठपुरावा केला. त्यांच्या पाठपुराव्याला यश आले असून आमदार कोट्यातून निधी मंजूर झाला. सध्या रस्तेकामाला सुरुवात झाली आहे. भूमिपूजनप्रसंगी प्रकाश नलावडे, मनीषा भोईर, संदीप विशे, अशोक सिनरप्पा, रमेश गवळी, किरण कांबळे, प्रवीण इंगळे, अजित भोसले, शकील शेख, देवकुळे उपस्थित होते.