धानिवरी पुलावर भीषण अपघात

धानिवरी पुलावर भीषण अपघात
बस आणि कंटेनरची धडक; सात प्रवासी जखमी
कासा, ता. २८ (बातमीदार) : मुंबई-अहमदाबाद राष्ट्रीय महामार्गावरील धानिवरी पुलावर रविवारी रात्री पावणेबारा वाजण्याच्या सुमारास एका खासगी प्रवासी बस आणि कंटेनरचा भीषण अपघात झाला. या दुर्घटनेत सात प्रवासी जखमी झाले असून, त्यातील एका महिलेची प्रकृती गंभीर असल्याचे समजते.

कासा पोलिस ठाण्याच्या माहितीनुसार, खासगी बस गुजरातकडे निघाली होती. या बसमध्ये एकूण २७ प्रवासी होते, धानिवरी पुलावर रस्त्याचे दुरुस्तीचे काम सुरू असल्याने एक बाजू वाहतुकीसाठी बंद होती. समोरील ट्रकचालकाने अचानक वेग कमी केल्याने बसचालक किसनभाई अहिर (रा. जहांगीरपुरा, सुरत, गुजरात) यांनी बसचा वेग कमी केला. त्याचवेळी मागून भरधाव वेगात आलेल्या कंटेनरने या बसला पाठीमागून जोरदार धडक दिली. या धडकेत बस समोर असलेल्या ट्रकला तसेच पुलावरील सुरक्षा कठड्याला धडकली. या अपघातात बसमधील हार्दिक तुलसीभाई सुरानी (वय ३२), केतुल रामानी (२७), प्रियंका दोबरीया (२९), जय रॉय (२८), रिद्धी सौरभ जागानी (२५), दिया जय रॉय (२९) हे किरकोळ जखमी झाले आहेत, तर नीलम पार्थ पटेल (२६) हिचा उजवा हात फॅक्चर होऊन ती गंभीर जखमी झाली आहे. जखमींना वेदांत हॉस्पिटल, तलासरी तसेच प्राथमिक आरोग्य केंद्र तलासरी येथे उपचारासाठी हलविण्यात आले. दरम्‍यान, अपघातग्रस्त वाहने क्रेनच्या मदतीने बाजूला करण्यात आली असून, या मार्गावरील वाहतूक पूर्ववत सुरू करण्यात आली आहे.

अपघाताची प्राथमिक चौकशी सुरू
धानिवरी पुलाचे दुरुस्तीचे काम गेल्या दोन वर्षांपासून अत्यंत संथ गतीने सुरू आहे. कधी मुंबईकडून जाणारी, तर कधी गुजरातकडून येणारी वाहतूक बंद करून काम केले जाते. त्यामुळे येथे वारंवार अपघात होत असून, दररोज वाहतूक कोंडी निर्माण होते, अनेक वेळा तक्रारी करूनही महामार्ग प्राधिकरण याकडे दुर्लक्ष करत असल्याची टीका स्थानिक नागरिकांकडून केली जात आहे. दरम्यान, या अपघाताचा कासा पोलिस अधिक तपास करत आहेत.