म्हाडाच्या घरांसाठी २२ हजार अर्ज

म्हाडाच्या घरांसाठी २२ हजार अर्ज

कोकण मंडळ : नऊ हजार जणांनी भरली अनामत रक्कम

सकाळ वृत्तसेवा
मुंबई, ता. २८ : सर्वसामान्यांच्या घराचे स्वप्न पूर्ण करण्यासाठी म्हाडाच्या कोकण मंडळाने पाच हजार २५७ घरांच्या विक्रीसाठी जाहीर केलेल्या लॉटरीला भरघोस प्रतिसाद मिळत आहे. अर्ज भरण्यास सुरुवात झाल्यापासून १४ दिवसांत तब्बल २१ हजार ९५१ जणांचे ऑनलाइन अर्ज आले. नऊ हजार २३६ लोकांनी अनामात रक्कम भरून आपला अर्ज अंतिम केला आहे. आणखी १६ दिवसांची मुदत असल्याने घरांसाठी मोठी स्पर्धा निर्माण झाली आहे.
म्हाडाच्या कोकण मंडळाने जाहीर केलेल्या पाच हजार २८५ घरांच्या लॉटरीत अल्यल्प म्हणजे वार्षिक सहा लाखांपर्यंत उत्पन्न असलेल्या गटासाठी तब्बल चार हजार ८०२ घरे राखीव ठेवली आहेत. तसेच नऊ लाखांपर्यंत वार्षिक उत्पन्न असलेल्या अल्प उत्पन्न गटातील कुटुंबासाठी ४५५ घरे राखीव आहेत. या घरांसाठी ऑनलाइन अर्ज करण्याच्या प्रक्रियेला १४ जुलैपासून सुरुवात झाली आहे. त्यानुसार आतापर्यंत आलेले अर्ज पाहता सर्वसामान्यांचा या लॉटरीला चांगला प्रतिसाद मिळत असल्याचे स्पष्ट झाले आहे.
---------------
१३ ऑगस्टपर्यंत मुदत
आज दुपारी साडेचार वाजेपर्यंत जवळपास २१ हजार ९५१ हून अधिक ऑनलाइन अर्ज आले आहेत. या लॉटरीसाठी १३ ऑगस्ट ही ऑनलाइन अर्ज करण्याची अंतिम मुदत आहे. सध्या म्हाडाकडे आलेल्या अर्जांमध्ये सर्वाधिक अत्यल्प आणि अल्प उत्पन्न गटासाठी सर्वाधिक अर्ज आहेत.