केडीएमसीच्या अग्निशमन विभागातील ५२ मीटर शिडी असलेली गाडी दोन वर्षांपासून नादुरुस्त

गगनचुंबी इमारतींची सुरक्षा वाऱ्यावर
केडीएमसीच्या अग्निशमन विभागातील ५२ मीटर शिडी असलेली गाडी दोन वर्षांपासून नादुरुस्त
मोठ्या इमारतीत आग लागल्यास जीवितहानी होण्याची भीती
कल्याण, ता. २९ (वार्ताहर) : कल्याण डोंबिवली महापालिका क्षेत्रात उंचच उंच गगनचुंबी इमारती उभारण्यात येत आहेत. या इमारतींना आग लागल्यास त्यावर नियंत्रण मिळविण्यासाठी कल्याण डोंबिवली पालिकेने ५२ मीटर शिडी असलेली अग्निशमन गाडी घेतली. मात्र ही गाडी गेल्या दोन वर्षांपासून बंद पडून अग्निशमन दल केंद्रातच उभी आहे. यामुळे मोठ्या इमारतीस आग लागल्यास जीवितहानी होण्याची शक्यता नाकारता येत नाही. त्यामुळे या कामात दिरंगाई करणाऱ्या अधिकाऱ्यांची चौकशी करून त्यांच्यावर कारवाई करण्याची मागणी माजी नगरसेवक तथा शिवसेना शिंदे गटाचे उपशहर प्रमुख मोहन उगले यांनी आयुक्तांकडे केली आहे.
कल्याण डोंबिवली महापालिकेने अग्निशमन केंद्र बळीकटीकरण करण्यासाठी विविध प्रकारच्या गाड्या घेण्यात आलेल्या आहेत. परंतु त्यामध्ये ५२ मीटर असलेली शिडीची गाडी गेल्या दीड ते दोन वर्षांपासून बंद आहे. शहरामधील गगनचुंबी इमारतीस आग लागल्यास जीवित व वित्तहानी होण्याची शक्यता आहे. या गोष्टीचा विचार करून संबंधित अधिकाऱ्यांवर कारवाई करावी अन्यथा कामात कुचराई केल्याबाबत संबंधित अधिकाऱ्यांना निलंबित करावे, अशी मागणी माजी नगरसेवक मोहन उगले यांनी आयुक्तांकडे केली आहे.

शहर अभियंत्यांच्या इमारतीला आग
कल्याण पश्चिमेस शहर अभियंता अनिता परदेशी यांच्या इमारतीमध्ये १६व्या मजल्यावर आग लागली होती. या आगीत संपूर्ण माळा खाक झाला. त्या ठिकाणी राहत असलेले डॉक्टर, व्यावसायिक यांचे संपूर्ण फर्निचर व मौल्यवान वस्तू जळून कोट्यवधींचे नुकसान झाले.

गाडी नादुरुस्त
गाडी नादुरुस्त असल्याचे तत्कालीन आयुक्त इंदुराणी जाखड यांच्या लक्षात येताच ठाणे, बदलापूर, नवी मुंबई येथून अग्निशामन गाड्या बोलावल्या होत्या, परंतु त्यास खूप उशीर झाला होता. त्या दिवशी अग्निशमन दलाचे कार्यरत असलेले अधिकारी नामदेव चौधरी यांनी १० दिवसांत ही गाडी दुरुस्त करू, असे सांगितले होते. परंतु अभियांत्रिकी शाखा व अग्निशामन शाखा यांच्यामध्ये झालेले वाद लक्षात घेता आजतागायत ही गाडी दुरुस्त झालेली नाही.

७० मीटर शिडीची गाडी घेणार
याबाबत कल्याण डोंबिवली अग्निशमन दलाचे मुख्य अग्निशमन अधिकारी नामदेव चौधरी यांना विचारले असता, येत्या १५ दिवसांत ही गाडी दुरुस्त केली जाणार असून, ७० मीटर शिडी असलेली गाडी घेण्याचेदेखील प्रस्तावित असल्याचे त्यांनी सांगितले.