निरंकारी भक्तांचे ठाकुर्लीत ८३ तर बोरिवलीत १४१ युनिट रक्तदान

निरंकारी भक्तांचे रक्तदान
कल्याण, ता. २८ (वार्ताहर) : सद्गुरू माता सुदीक्षा यांच्या उदात्त शिकवणुकीला अनुसरत ‘निष्काम भावनेने मानवसेवा करणे ही ईश्वराची श्रेष्ठ भक्ती आहे’ या भावनेतून रविवार (ता. २७) ठाकुर्ली आणि बोरिवली येथे रक्तदान शिबिर पार पडले. संत निरंकारी मिशनची सामाजिक शाखा संत निरंकारी चॅरिटेबल फाउंडेशनच्या विद्यमाने आयोजित दोन रक्तदान शिबिरांमध्ये २२४ भक्तांनी रक्तदान केले.
ठाकुर्लीतील संत निरंकारी सत्संग भवन (पूर्व) येथे संत निरंकारी मिशनच्या डोंबिवली झोनअंतर्गत आयोजित केलेल्या रक्तदान शिबिरामध्ये ८३ निरंकारी भक्तांनी उत्साहाने रक्तदान केले. यामध्ये ६४ पुरुष तर १९ महिला रक्तदात्यांचा समावेश होता. या शिबिरामध्ये मुंबईतील संत निरकारी रक्तपेढीमार्फत रक्त संकलन करण्यात आले.
डोंबिवली झोनचे प्रभारी रावसाहेब हसबे यांच्या प्रमुख उपस्थितीत नामस्मरण करून शिबिराला शुभारंभ करण्यात आला. याप्रसंगी सेवा दलाचे क्षेत्रीय संचालक जनार्दन म्हात्रे तसेच इतर मान्यवर उपस्थित होते. मिशनच्या ठाकुर्ली शाखेचे मुखी कृष्णकांत कांबळी यांच्या देखरेखीखाली आयोजित हे शिबिर यशस्वी करण्यामध्ये स्थानिक सेवादल युनिट व संत निरंकारी चॅरिटेबल फाउंडेशनच्या सदस्यांनी योगदान दिले.
संत निरंकारी मिशनच्या बोरिवलीच्या वतीने संत निरंकारी सत्संग भवन, गोराई येथील रक्तदान शिबिरामध्ये १४१ भक्तांनी रक्तदान केले. मिशनचे स्थानिक सेक्टर संयोजक वामन सावंत यांच्या देखरेखीखाली या शिबिरामध्ये स्थानिक मुखी गजानन चव्हाण आणि स्थानिक सेवा दल युनिटने योगदान दिले.