शहापूर राष्ट्रवादी काँग्रेसमध्ये संघटनात्मक बदल

शहापूर, ता. २८ (वार्ताहर) : काही महिन्यांपासून फुटीचे ग्रहण लागलेल्या शरदचंद्र पवार यांच्या नेतृत्वाखाली शहापूर राष्ट्रवादी काँग्रेसमध्ये रविवारी (ता.२७) खासदार सुरेश म्हात्रे यांच्या उपस्थितीत मोठे संघटनात्मक बदल करण्यात आले आहेत. शहापूर शहरातील कुणबी भवन समाजसभागृहात झालेल्या मेळाव्यात संघटनात्मक बदलांची घोषणा करण्यात आली.
मनोज विशे यांना तालुकाध्यक्ष पदावरून हटवून त्यांच्याजागी नंदकुमार मोगरे यांची नियुक्ती करण्यात आली. जिल्हा समन्वयकपदी संतोष शिंदे यांची निवड केली आहे. तालुका कार्याध्यक्षपदी जयराम पवार आणि महिला संघटकपदी कमल भोईर यांची नेमणूक केली आहे. काही महिन्यांत सातत्याने पक्षांतराच्या घटना शहापूर राष्ट्रवादी काँग्रेसमध्ये घडून आल्या आहेत. पक्षात वारंवार फूट पडत गेल्याने पक्षाची तालुक्यातील शक्ती क्षीण होत चालली आहे. काही दिवसांपासून तालुकाध्यक्ष बदला, अशी मागणी कार्यकर्त्यांकडून होत होती. दुसरीकडे पक्षाच्या बैठका आणि निर्णयांची माहिती दिली जात नसल्याबाबत पदाधिकारी नाराजी व्यक्त करीत होते. अशातच एक गट पक्षातून बाहेर पडण्याची तयारीही करत होता. अशा पक्षांतर्गत बाधक घडामोडींना आवर घालण्यासाठी तातडीने मोठे बदल घडवून आणण्यात आले आहेत.

फूट रोखण्याचा प्रयत्न
नंदकुमार मोगरे यांना दुसऱ्यांदा तालुकाध्यक्ष पदाची संधी मिळाली आहे. तर संतोष शिंदे हे खासदार म्हात्रे यांचे समर्थक असून त्यांची राजकीय कारकीर्द विशेषकरून शिवसेना, मनसे आणि भाजपमध्ये गेली आहे. त्यांना राष्ट्रवादी काँग्रेसमध्ये पहिल्यांदाच मोठ्या पदावर काम करण्याची संधी मिळाली आहे. मोगरे आणि शिंदे यांची अनुक्रमे तालुकाध्यक्ष व जिल्हा समन्वयकपदी नेमणूक करून पक्षातील फूट रोखण्याचा प्रयत्न रविवारी करण्यात आला. येत्या जिल्हा परिषद व पंचायत समिती निवडणुकीच्या पार्श्वभूमीवर नवीन नेमणुकांना विशेष महत्त्व आले आहे.