कसारा मार्गावर दरड कोसळण्याची भीती

शहापूर, ता. २८ (वार्ताहर) : मध्य रेल्वेच्या वासिंद ते कसारा लोहमार्गावर आसनगाव, आटगाव, खर्डी ते उंबरमाळी कसाऱ्यापर्यंतच्या स्थानकांदरम्यान अनेक ठिकाणी दोन्ही बाजूला दरडप्रवण क्षेत्र आहे. पावसाच्या दिवसांत येथे दरड कोसळण्याची भीती प्रवाशांमध्ये आहे.
मागील आठवड्यात कसारा स्थानकाच्या अलिकडे दरडीच्या भागातील दगड व माती कोसळून झालेल्या अपघातात दोन प्रवासी किरकोळ जखमी झाले होते. दरड कोसळण्यामुळे मोठ्या अपघाताची शक्यता असून, रेल्वेने उपाययोजना करणे गरजेचे असल्याचे मत कल्याण, कसारा, कर्जत रेल्वे प्रवासी संघटनेचे अध्यक्ष राजेश घनघाव यांनी व्यक्त केले. त्या दृष्टीने रेल्वे प्रशासन सतर्क असले, तरी उपाययोजना करून अपघातप्रवण क्षेत्रांत कायमस्वरूपी यंत्रणा तैनात असणे गरजेचे आहे. कसारा ते आसनगाव भागात कायमस्वरूपी रुग्णवाहिका, आपत्कालीन कक्ष असल्यास दुर्घटना घडल्यास तातडीने जखमींना उपचार मिळतील; तसेच आपत्कालीन मोबाइल क्रमांक पावसाच्या दिवसात जाहीर करून जनजागृती करणे आवश्यक असल्याचे घनघाव यांनी म्हटले आहे. कसारा ते इगतपूरी दरम्यानच्या घाटातील रेल्वे मार्गातही दरड कोसळण्याची भीती प्रवासी व्यक्त करत आहेत. रेल्वे प्रशासनाने उपाययोजना करण्याची मागणी करण्यात आली आहे.