क्षितिजोत्सव दहीहंडी प्रीमियर लीगला सलामी

दहीहंडी पथकाची क्षितिजोत्सव प्रीमियर लीगला सलामी
५० संघांनी लावली हजेरी, अंतिम फेरीसाठी १६ संघांची निवड
विरार, ता. २८ (बातमीदार) ः बोल बजरंग बली की जय, गोविंदा आला रे आला असे नारे देत पालघर जिल्ह्यातील वेगवेगळ्या ठिकाणची दहीहंडी पथके विरार येथील नवीन विवा महाविद्यालयाकडे येत होती. या ठिकाणी ५० संघांचा दहीहंडीचा थरार उपस्थितांना पाहायला मिळाला. या चाचणीत १६ संघांची अंतिम फेरीसाठी निवड केली आहे.
विरारमध्ये दहीहंडी प्रीमिअर लीगचा रविवारी थरार पाहायला मिळाला. या लीगचे भारतीय क्रिकेटपट्टू श्रेयस अय्यर मुख्य आकर्षण होता. या दहीहंडी लीगमधील महिलांची स्पर्धा ही राज्यात प्रथमच क्षितिज ठाकूर यांच्या पुढाकाराने होत आहे. स्पर्धेला माजी आमदार हितेंद्र ठाकूर, माजी आमदार क्षितिज ठाकूर, प्रतीक ठाकूर आणि अमित घोडके यांची मुख्य उपस्थिती होती. नंतर सुरू झाला तो दहीहंडीचा थरार. एका मागून एक पथके मानवी मनोरे उभे करून सलामी देत होती. प्रेक्षकही टाळ्या-शिट्ट्यांनी संघाला दाद देत होते.
रविवारी रंगणार अंतिम स्पर्धा
क्षितिज ठाकूर यांच्या मार्गदर्शनाखाली आणि वसई कला क्रीडा विकास मंडळ, यंग स्टार ट्र्स्ट यांच्या सहकार्याने दहीहंडी असोसिएशनने या स्पर्धेचे आयोजन केले होते. या स्पर्धेची निवड चाचणी नव्या विवा कॉलेज येथे संपन्न झाली. त्यात ५० पथकांचा समावेश होता. या पथकातून निवड झालेल्या संघांची अंतिम स्पर्धा रविवार (ता. १०) न्यू विवा कॉलेज विरार येथे होणार आहे. या अंतिम फेरीत पुरुषांना सात थर तर महिलांना पाच थर लावावे लागणार आहेत.