घोडबंदर मार्गावर गॅस टँकरचा अपघात

घोडबंदर मार्गावर गॅस टँकरचा अपघात

सकाळ वृत्तसेवा
ठाणे, ता. २८ : कळंबोलीहून घोडबंदरमार्गे गुजरात येथे निघालेल्या गॅस टँकरचालकाचे नियंत्रण सुटून हा टँकर मानपाडा उड्डाणपुलाजवळील मेट्रोच्या पिलरला धडकल्याची घटना सोमवारी सकाळी पावणेदहा वाजण्याच्या सुमारास घडली. या अपघातामुळे या मार्गावरील वाहतुकीवर परिणाम झाला. सुमारे चार तासांनी अपघातग्रस्त टँकर रस्त्यातून बाजूला केल्यानंतर हा मार्ग वाहतुकीसाठी मोकळा झाला. या अपघातात कोणालाही दुखापत झाली नसल्याची माहिती ठाणे महापालिका आपत्ती व्यवस्थापन अधिकाऱ्यांनी दिली.

टँकरचालक गौतम गोविंदा हा सोमवारी सकाळी कळंबोलीहून गुजरात येथील अंकलेश्वर येथे १६ टन प्रोपिलीन गॅस घेऊन निघाला होता. याचदरम्यान चालकाचे टँकरवरील नियंत्रण सुटले आणि हा टॅंकर मानपाडा उड्डाणपुलाजवळ असलेल्या मेट्रोच्या पिलरला जाऊन धडकला. या अपघाताची माहिती मिळताच घटनास्थळी शहर वाहतूक पोलिस, आपत्ती व्यवस्थापन कक्षाचे कर्मचारी व अग्निशमन दलाने धाव घेतली. या अपघातात टँकरच्या केबिनचे नुकसान झाले. या वेळी टँकरमध्ये अडकलेल्या चालकाला सुखरूप बाहेर काढण्यात आले. दरम्यान, सुमारे चार तासांच्या प्रयत्नांनंतर अपघातग्रस्त टँकर रस्त्याच्या एका बाजूला करण्यात आल्यावर मानपाडा उड्डाणपूल वाहतुकीसाठी मोकळा करण्यात आला. त्यानंतर घोडबंदर रोडवरील वाहतूक सुरळीत झाल्याची माहिती आपत्ती व्यवस्थापन अधिकाऱ्यांनी दिली.