मानकिवली एमआयडीसीत बॉयलरने घेतला पेट

मानकीवली एमआयडीसीत बॉयलरने घेतला पेट

बदलापूर, ता. २८ (बातमीदार) : माणकीवली एमआयडीसी परिसरातील एव्हीए या केमिकल कंपनीतील रासायनिक वायूच्या बॉयलरने अचानक पेट घेतल्याची घटना सोमवारी सायंकाळी साडेसहा वाजण्याच्या सुमारास घडली. या वेळी अग्निशमन दलाने घटनास्थळी धाव घेत पाऊण तासात या आगीवर नियंत्रण मिळवले.
बदलापूर पूर्वेकडील माणकीवली एमआयडीसी परिसरात एव्हीए नावाची एक केमिकल कंपनी आहे. कंपनीत नियमित काम सुरू असताना अचानक तेल गळतीमुळे येथील रासायनिक वायूच्या बॉयलरने पेट घेतला. थोड्याच वेळात ही आग वाढली. आग वाढत असल्याचे लक्षात येताच कंपनीतील कर्मचाऱ्यांनी अग्निशमन दलाला पाचारण केले. या वेळी अग्निशमन दलाचे अधिकारी शैलेश जगताप, संदीप माने, प्रदीप जाधव, मुठे यांच्या नेतृत्वाखाली त्यांच्या संपूर्ण पथकाने या ठिकाणी धाव घेत पाणी व फोमचा वापर करून पाऊण तासात या आगीवर नियंत्रण मिळवले. त्यामुळे या ठिकाणी होणारी मोठी दुर्घटना टळली. तसेच या घटनेत सुदैवाने कोणालाही इजा झाली नसल्याची माहिती शैलेश जगताप यांनी दिली.