भरधाव कारचा भीषण अपघात

भरधाव कारचा भीषण अपघात
पाम बीच मार्गावरल घटनेत कारचालकासह दोघे जखमी

नवी मुंबई, ता. २८ (वार्ताहर) : सीवूड्स येथून पाम बीच मार्गे वाशीच्या दिशेने जाणाऱ्या भरधाव आलिशान कारवरील चालकाचे नियंत्रण सुटल्याने अपघाताची घटना घडली. यामध्ये ही भरधाव कार ज्वेल ऑफ नवी मुंबई तलावाजवळ रस्ता दुभाजकाचे रेलिंग तोडून बेलापूर मार्गिकेवर गेली. ही घटना सोमवारी पहाटे २ वाजण्याच्या सुमारास घडली. या भीषण अपघातात कार चालक व त्याचा मित्र हे दोघे जखमी झाले असून त्यांच्यावर बेलापूर येथील रुग्णालयात उपचार सुरू आहेत. नेरूळ पोलिसांनी कारचालकाविरोधात निष्काळजीने वाहन चालविल्याप्रकरणी गुन्हा दाखल केला आहे.

मोहम्मद सलमान शेख (वय २०) व मोहम्मद सुफीयान शेख (वय १९) अशी या अपघातात जखमी झालेल्यांची नावे आहेत. हे दोघेही सीवूड्स येथे राहण्यास असून, ते सध्या शिक्षण घेत आहेत. सोमवारी पहाटे २ वाजण्याच्या सुमारास हे दोघे मित्र कारने पाम बीच मार्गावर फेरफटका मारण्यासाठी निघाले होते. हे दोघे मित्र सीवूड्स येथून भरधाव वेगाने वाशीच्या दिशेने जात असताना, पाम बीच मार्गावरील ज्वेल ऑफ नवी मुंबई तलावाजवळ आल्यानंतर कारचालक मोहम्मद सलमान शेख याचे कारवरील नियंत्रण सुटले. त्यामुळे ही कार रस्ता दुभाजकावर असलेले रेलिंग तोडून पलटी मारत बेलापूर मार्गिकेवर गेली. या अपघातात कारचालकासह त्याचा मित्र दोघे गंभीर जखमी झाले. यात कारचेदेखील मोठ्या प्रमाणात नुकसान झाले.