चारचाकीच्या धडकेत महिला जखमी

चारचाकीच्या धडकेत महिला जखमी
अंबरनाथ, ता. २८ (वार्ताहर) : अंबरनाथ पूर्वेला वैभव चौकात पाठीमागून एका दुचाकीला चारचाकीने धडक दिल्याने मोठा अपघात झाला. यामध्ये दुचाकीवरील महिला व तिचा पती गंभीररीत्या जखमी झाले. शनिवारी (ता. २६) मध्यरात्री ही घटना घडली असून, चालक फरार झाला आहे.
प्रियांका नाईक (वय ३०) यांचा वडापावचा व्यवसाय आहे. त्या शनिवारी रात्री त्यांच्या पतीसोबत स्कुटीवरून काटई-बदलापूर रस्त्यावरील वैभव चौकातून जात असताना पाठीमागून एका अज्ञात चारचाकीने त्यांच्या स्कुटीला जोरदार धडक दिली. या अपघातात प्रियांका यांना गंभीर दुखापत झाली, तर त्यांचे पतीही जखमी झाले. दरम्यान, प्रियांका नाईक यांना तातडीने रुग्णालयात दाखल करण्यात आले असून, त्यांची प्रकृती गंभीर असल्याचे सांगण्यात येत आहे. याप्रकरणी शिवाजीनगर पोलिस ठाण्यात चारचाकी चालकाविरोधात गुन्हा दाखल केला असून, पोलिस अधिक तपास करीत आहेत.