राजकीय डावपेचांना पनवेलमध्ये वेग

पनवेल ता. २९ (बातमीदार)ः तालुक्यातील जिल्हा परिषद आणि पंचायत समिती निवडणुकीसाठी जाहीर झालेल्या प्राथमिक प्रभाग रचनेबाबतत नागरिकांकडून आक्षेप नोंदवण्यात आलेले नाहीत. त्यामुळे पनवेल प्रभागात एकूण आठ गट आणि १६ गण कायम राहणार असल्याने १८ ऑगस्ट रोजी अंतिम प्रभाग रचना जाहीर झाल्यावर राजकीय डावपेचांना वेग येणार आहे.
आगामी स्थानिक स्वराज्य संस्थांच्या निवडणुकांसाठी प्रशासनाने जय्यत तयारी सुरू आहे. त्याचाच एक भाग म्हणून प्रभाग रचना केली जात आहे. त्यानुसार जिल्हा परिषदेच्या गट आणि गण रचनेचा प्रारूप आराखडा १४ जुलै रोजी जाहीर करण्यात आला. २१ जुलैपर्यंत यासाठीच्या हरकती आणि सूचना प्रशासनाने मागवल्या होत्या, पण पनवेल तालुक्यातील प्रभाग रचनेवर एकही आक्षेप किंवा सूचना नोंदवली गेली नाही. त्यामुळे पनवेल तालुक्यातील आठ गटांत प्रत्येकी दोन गण असतील, अशी १६ गणांची रचना कायम आहे. यामुळे आगामी निवडणुका २०१७ च्या मूळ रचनेनुसारच होणार असून, रणनीतीला वेग येणार आहे.
--------------------------------
अंतिम प्रभाग रचना १८ ऑगस्टला
पनवेल तालुक्यात जिल्हा परिषदेचे आठ सदस्य आणि पंचायत समितीचे १६ सदस्य आहेत. निवडणूक विभागाने नुकतीच प्राथमिक प्रभाग रचना जाहीर केली होती. सामान्यतः प्रभाग रचना जाहीर झाल्यानंतर नागरिक, राजकीय पक्ष किंवा इच्छुक उमेदवार यांच्याकडून आक्षेप अथवा सूचना येतात. आता अंतिम प्रभाग रचना १८ ऑगस्ट रोजी जाहीर करण्यात येणार आहे.
---------------------------------------------
जिल्हा परिषदेच्या गट आणि गण रचनेचा प्रारूप आराखडा जाहीर केल्यानंतर यावर हरकती आणि सूचना मागवल्या होत्या. विहित मुदतीत एकही हरकत आली नसल्याने पनवेल तालुक्यातील आठ गट व १६ गणांची रचना कायम आहे.
- विजय पाटील, तहसीलदार, पनवेल