शहापूर ते खोपोली (हाळ) मार्गाची दुरवस्‍था

शहापूर-खोपोली मार्गाची दुरवस्‍था
कर्जत, ता. २९ (बातमीदार) : शहापूर ते खोपोली (हाळ) दरम्यानचा राष्ट्रीय महामार्ग क्रमांक ५४८-अ सध्या अत्यंत दयनीय अवस्थेत असून, या मार्गावर प्रवास करणाऱ्या वाहनचालकांना अक्षरशः जीव मुठीत धरावा लागत आहे. मुंबई-नागपूर समृद्धी महामार्गाला वळसा घालून जेएनपीटीमार्गे शहापूर, मुरबाड, कर्जत आणि खोपोली यांसारखी महत्त्वाची शहरे जोडतो, परंतु गेल्या आठ वर्षांपासून रस्त्याची अवस्था सुधारण्याकडे प्रशासनाने सातत्याने दुर्लक्ष केल्यामुळे वाहनचालकांमधून रोष व्‍यक्‍त केला जात आहे.
कळंब, कशेळे, वंजारवाडी पूल, कडाव, श्रीरामपूल, चारफाटा परिसरातील रस्त्यांवर इतके खोल खड्डे पडले आहेत की, हा महामार्ग आहे की एखाद्या दुर्लक्षित गावातील रस्ता, असा प्रश्न वाहनचालक विचारू लागले आहेत. विशेष म्हणजे, सत्ताधारी पक्षांचे कार्यालयेही या महामार्गालगत असूनही परिस्थिती बदललेली नाही. यामुळे सत्ताधाऱ्यांच्या भूमिकेवरही प्रश्नचिन्ह उपस्थित होत आहे.
महामार्ग पुढे वर्णे, तळवली, नावंडे, हाल या गावांतून जात असला तरी शेतकऱ्यांना भूसंपादनाचा मोबदला दिला नसल्यामुळे अनेक ठिकाणी काम थांबले आहे. काही ठिकाणी मोबदला ‘टक्केवारीच्या राजकारणा’त अडकला असल्याचे आरोप स्थानिकांकडून केले जात आहेत. परिणामी, रस्त्याचे पूर्णत्व कोसो दूर आहे. अपूर्ण रस्ता, गायब झालेला जुना मार्ग आणि स्थानिक कार्यालयाच्या अभावामुळे नागरिकांचा रोष वाढत चालला आहे.
या रस्त्याच्या देखभालीची जबाबदारी एमएसआरडीसीकडे असली तरी गेल्या आठ वर्षांत केवळ तात्पुरत्या मलमपट्ट्याशिवाय काहीही झालेले नाही. मुंबईतील दूरस्थ कार्यालयातून स्थानिक समस्यांकडे दुर्लक्ष होत असल्याची भावना नागरिकांत आहे. त्यामुळे आता ‘काँक्रीटीकरण करा, नाहीतर आंदोलन करू’ अशी भूमिका सामाजिक संघटनांनी घेतली आहे.